Ираны тал цэрэг дайны үүднээс бүрэн ялагдал хүлээсэн гэж АНУ-ын эрх баригчид мэдэгдэж байгаа боловч Америкийн тагнуулын мэдээлэл үүнээс зөрүүтэй байна. Мэдээлэлд дурдсанаар, Исламын БНУ пуужин хөөргөх хөдөлгөөнт төхөөрөмжийнхөө 70 орчим хувь, дайны өмнө байсан пуужингуудынхаа мөн 70 орчим хувийг хадгалж үлджээ.

Эдгээр нь бүс нутгийн улсуудад цохилт өгч чадах баллистик пуужингууд, хуурай газар болон тэнгист ойрын зайд байгаа байнуудыг онилсон далавчит пуужингууд юм.

Түүнээс гадна Ираны тал Ормузын хоолойн дагуу байрлуулсан 33 пуужингийн цогцолбороос 30-ыг нь засаж сэлбэснээр байлдааны бэлэн байдалд оруулжээ. Эдгээр нь Америкийн хөлөг онгоцууд, нефть тээвэрлэгч танкеруудад аюул учруулж магадгүй гэдгийг тагнуулын мэдээлэлд онцолсон байна.

Хиймэл дагуулаас авсан гэрэл зургуудыг үзвэл, Ираны тал пуужингууд болон хөөргөх төхөөрөмжүүдийг хадгалдаг газар дорх байгууламжуудынхаа 90 орчим хувийг сэргээн засварлажээ.

Эдгээр баримт нь Ерөнхийлөгч Д.Трамп, Батлан хамгаалахын сайд П.Хегсет нарын ярьж хэлж буйг бүрэн үгүйсгэж байгаа юм. “Вашингтон Пост” сонинд бичсэнээр, Америкийн зэвсэгт хүчний Ираны пуужингийн объектуудад өгсөн цохилтоос учирсан хохирлыг Д.Трамп ба түүний цэргийн зөвлөхүүд хэт дөвийлгөж, Ираны талын тэвчээр хатуужил, түргэн сэргэх чадварыг дутуу үнэлсэн байна.

Тус сонины мэдээллээр, “Томагавк” далавчит пуужин, зенитийн пуужингийн "Патриот" цогцолбор, газарт байрлалтай Precision Strike, АTACMS пуужингуудын нөөц шавхагдсаар байгаа ажээ. Иймээс Украинд зориулан олон тэрбум долларын зэвсэг хэрэгсэл захиалаад буй АНУ-ын Европ дахь холбоотнууд үүнд санаа зовниж байна. Харин өчигдөр Д.Трамп Truth Social нийгмийн сүлжээний хуудсандаа бичихдээ, Цагаан ордны байр суурийг үгүйсгэсэн нийтлэл бичих нь “үнэн хэрэгтээ урвалт” бөгөөд дайсныг дэмжиж буй хэрэг гэжээ.

Мөн Цагаан ордны албан ёсны төлөөлөгч Оливия Уэльс тагнуулын мэдээллийн талаарх сонины нийтлэлүүдэд тайлбар өгөхдөө, Ираны цэргийн чадавхийг бүрэн устгасан гэх Трампын үгийг давтсан байна.