Сербийн түүхэнд анх удаа тус улсын нутаг дэвсгэрт НАТО-той хамтарсан хээрийн сургуулилалт явагдаж байна.

НАТО-гийн эвслийн “Энхийн төлөөх түншлэл” хөтөлбөрийн хүрээнд хийж буй “НАТО-Серб” гэдэг нэртэй уг сургуулилалт энэ сарын 23 хүртэл үргэлжлэх бөгөөд түүнд Серб, Итали, Румын, Туркийн 600 орчим цэрэг, түүнчлэн Герман зэрэг НАТО-гийн бусад гишүүн улсуудын ажиглагчид оролцож байна.

Балканы хойг дахь хөрш орнуудаасаа ялгаатай нь гэвэл, Серб бол НАТО-гийн гишүүн биш бөгөөд Белградын эрх баригчид үүнийг төвийг сахих бодлого хэмээн тайлбарладаг. Гэхдээ тус улс бараг 20 жилийн турш НАТО-гийн “Энхийн төлөөх түншлэл” хөтөлбөрт хамрагдаж ирсэн бөгөөд хамтарсан хээрийн сургуулиудад байнга оролцдог ажээ. Үүний зэрэгцээ Оростой тогтоосон найрамдалт харилцаагаа хадгалдаг.

Энэ удаагийн хээрийн сургуулийг Сербийн зэвсэгт хүчний хуурай замын цэргийн командлал ба Италийн Неаполь хотд байрлах НАТО-гийн нэгдсэн хүчний командлал хамтран зохион байгуулж байна. Өчигдөр нийтлэгдсэн гэрэл зургууд дээр Сербийн төв нутгийн Буяновац хотын ойролцоох “Боровац” хээрийн сургуулийн талбайд Сербийн ба НАТО-гийн гишүүн орнуудын цэргүүд зэрэгцэн зогсож буй нь харагдана.

Косовогийн дайны үед НАТО-гийн онгоцууд Сербийг бөмбөгдсөн 1999 оноос хойш Умард Атлантын эвсэлтэй хамтран ажиллах нь эмзэг сэдэв байсаар ирсэн юм. Өдгөөг хүртэл Косовод НАТО-гийн удирдлага дор олон улсын энхийг сахиулах KFOR хүчнийхэн үүрэг гүйцэтгэсээр байна.

Сербийн тал өнөөг хүртэл Косовог хүлээн зөвшөөрөхгүй байгаа юм.