Хантавирусний халдварын дэгдэлт бүртгэгдсэн "MV Hondius" аяллын хөлөг онгоцны сүүлчийн зургаан зорчигч Испанийн Тенерифе арлын Гранадилья-де-Абона боомтод уг хөлөг онгоцыг орхин буужээ.
Хэвлэлүүдэд мэдээлж буйгаар, нүүлгэн шилжүүлэх ажиллагаа тавдугаар сарын 11-ний орой дууссан байна. Австрали, Их Британи, Шинэ Зеландын иргэд болох сүүлийн зорчигчдыг нисэх онгоцны буудалд хүргэсэн бөгөөд тэднийг Нидерландад тусгаарлах юм.
Багийн гишүүдийн заримыг болон эмнэлгийн ажилтнуудыг тусдаа нислэгээр Нидерланд руу нүүлгэн шилжүүлсэн бол багийн үлдсэн гишүүд хөлөг онгоц дээрээ үлдэж, аяллаа үргэлжлүүлэхээр болжээ.
Эрх баригчдын өгсөн мэдээллээр, халдварын дэгдэлтийн үеэр нийт 94 хүнийг хөлөг онгоцноос нүүлгэн шилжүүлж, нутагт нь буцаасан байна. Ажиллагаа эхлэх үед хөлөг онгоц дээр 23 орны зорчигчид болон багийн гишүүд байсан байна.
Тавдугаар сарын эхээр халдварын анхны тохиолдол бүртгэгдсэн тухай мэдээлсний дараа нүүлгэн шилжүүлэх олон улсын томоохон ажиллагааг эхлүүлжээ.
Үүнээс өмнө АНУ-д мөн хантавирусний халдварын дэгдэлт гарсан аяллын хөлөг онгоцны 18 зорчигчийг нүүлгэн шилжүүлж, эмнэлгийн хяналтад авсан тухай мэдээлж байв. "MV Hondius" хөлөг онгоцны халдвартай хүмүүстэй хавьталд орсон зорчигчдод 42 хоногийн турш тусгаарлалтын дэглэм сахихыг Дэлхийн эрүүл мэндийн байгууллагаас (ДЭМБ) зөвлөсөн байна.
