Хантавирусийн аюултай омгийн халдвар дэгдсэн тансаг зэрэглэлийн аяллын хөлөг онгоц Тенерифе арлын ойролцоо зангуугаа буулгахаар зэхэж байгаа тул улс орнууд иргэдээ татан авахаар бэлтгэж байна. ДЭМБ-ын мэдээлснээр, халдвар өргөн хүрээнд тархах эрсдэл бага байгаа ажээ. Тус байгууллага бямба гарагт гишүүн орнуудад хандаж, татан авах ажиллагааг хэрхэн зохион байгуулах талаар зааварчилгаа өгсөн бөгөөд халдвар авсан байх магадлалтай иргэдийг  42 хоногийн турш анхааралдаа авч, хянахыг зөвлөв.

ДЭМБ-ын Ерөнхий захирал Тедрос Адханом Гебрейесус одоогоор нийгмийн эрүүл мэндэд учрах эрсдэл бага байгааг онцлоод, үүссэн нөхцөл байдал нь “Ковид шиг өргөн хүрээтэй биш” гэдгийг хэллээ. Тансаг зэрэглэлийн “MV Hondius” аяллын хөлөг онгоцон дээр хантавирусийн халдвар илэрсэнтэй холбогдуулан ДЭМБ болон Европын Холбооноос Кабо-Верде улсад хандан, зорчигчдыг нүүлгэн шилжүүлэх ажиллагааг уялдуулан зохицуулах хүсэлт тавьсан байна.

Хүсэлтийн дагуу тус хөлөг онгоц өнгөрсөн лхагва гарагт Кабо-Вердегийн эргээс Испанийг чиглэн хөдөлсөн юм. Хөлөгт байсан нийт найман хүн өвчилж, гурван хүн (Нидерландын гэр бүл, Германы нэг иргэн) нас барсан тухай ДЭМБ баасан гаригт мэдээлсэн байна.

Испанийн Дотоод хэргийн сайд бямба гаригт мэдээлснээр, Бельги, Франц, Герман, Ирланд болон Нидерланд улсууд иргэдээ татан авахын тулд тусгай үүргийн нислэг үйлдэхээр төлөвлөж байгаа ажээ. Харин Их Британийн эрүүл мэндийн байгууллагууд өөрийн улсын иргэд болон багийн гишүүдийг эх оронд нь авчирсны дараа Английн баруун хойд нутгийн нэгэн эмнэлэгт тусгаарлахаар шийдвэрлэсэн байна. 

Испанийн Эрүүл мэндийн сайд Моника Гарсиягийн хэлснээр, бүх зорчигчид болон багийн 17 гишүүнийг нүүлгэн шилжүүлэх бөгөөд үлдсэн 30 ажилтан хөлөг онгоцыг Нидерландад хүргэхээр үлдэх ажээ.

Reuters