Сонгуульд ялсан “Тиса” намын дарга, Европын үзэл санааг дэмжигч консерватив үзэлтэй улстөрч, 45 настай Петер Мажарыг бямба гаригт болсон шинэ парламентын анхны хуралдаанаар Унгарын Ерөнхий сайдаар албан ёсоор томиллоо. Ерөнхий сайдаар томилохыг парламентын 140 гишүүн дэмжиж, 54 гишүүн эсрэг санал өгсөн бол нэг гишүүн түдгэлзжээ. Гишүүний мандат авахаас татгалзсан өмнөх ерөнхий сайд В.Орбан хуралдаанд оролцоогүй байна.
Тангараг өргөснийхөө дараа Мажар “би Унгарыг захирахгүй, харин эх орондоо хүчин зүтгэнэ” гэв. Тэрбээр хоёр арван жилийг дамнан унгарчуудыг “зам, эмнэлэг, сургуульгүй” болгосон Орбаны авлигын тогтолцоог хатуу шүүмжиллээ. Сүүлийн 16 жилийн хугацаанд улс орныг тасралтгүй удирдсан Орбаны эрх мэдлээ урвуулан ашигласан үйлдлүүдийг илрүүлж, хууль бусаар завшсан хөрөнгийг нь эргүүлэн авчрах үүрэг бүхий хараат бус байгууллагыг байгуулна" хэмээн мэдэгджээ.
Шинэ ерөнхий сайд Орбаны ойрын хамтран зүтгэгч болох ерөнхийлөгч Томаш Шуйоктой хамтран ажиллахгүй гэдгээ мэдэгдээд, тавдугаар сарын 30 гэхэд огцорсон байхыг ерөнхийлөгч болон Орбаны хамсаатан хүмүүст уриаллаа. Ерөнхий сайдыг томилох ёслолын ажиллагааг парламентын ордны гадаа хуран цугларсан хэдэн арван мянган хүн том дэлгэцээр үзэж байв.
Ерөнхий сайдаар томилогдсонтой нь холбогдуулан Европын комиссын дарга Урсула фон дер Ляйен, Украины ерөнхийлөгч В.Зеленский болон гадаадын улстөрчид П.Мажарт баяр хүргэсэн байна. Мөн шинэ парламентын анх хуралдааны үеэр Агнеш Форстхофферыг парламентын спикерээр томилжээ. Европын Холбооны далбааг парламентын ордны дээр дахин мандуулах нь түүний анхны шийдвэр байлаа.
Сануулан дурдахад, дөрөвдүгээр сарын 12-нд болсон парламентын сонгуульд Мажарын удирдсан баруун төвийн үзэлт “Тиса” нам парламентын нийт 199 суудлын 141-ийг нь буюу 2/3-оос дээш хувийг нь авсан юм. Хуульч мэргэжилтэй Петер Мажар өмнө нь Орбаны “Фидес” намын залуучуудын жигүүрийн гишүүн байсан бөгөөд 2024 оны эхээр улс төрийн тавцанд гэнэт гарч ирсэн байна. Уран илтгэх авьяастай тэрбээр “Тиса” гэдэг намыг байгуулж, Унгарт эрс шинэчлэл хийхээ амалж, Орбаны дэглэмийн эсрэг тэмцэлд олон мянган хүнийг уриалан дууджээ.
