Энэ оны дөрөвдүгээр сарын 1-ний байдлаар Японд хүүхдийн тоо 13.29 сая болж, өмнөх оныхоос 350 мянгаар цөөрсөн нь бүртгэл хөтөлж эхэлснээс хойших хамгийн доод үзүүлэлт болсныг тус улсын Дотоод хэрэг, харилцаа холбооны яам мэдээлсэн байна.

Нийт хүн амд эзлэх 15 хүртэлх насны хүүхдийн тоо 10.8 хувь болж буурсан нь мөн 1950 оноос хойших хамгийн доод үзүүлэлт болжээ. Хүүхдийн тоо сүүлийн 45 жилийн турш тасралтгүй буурч байгаа бөгөөд хамгийн өндөр үзүүлэлт 1954 онд (29.89 сая хүүхэд) бүртгэгдэж байв.

Насны бүтцээс харахад төрөлт буурч буй хандлага тодорхой ажиглагдаж байна. Тухайлбал, 12-14 насны хүүхдүүд 3.09 сая байгаа бол 2 хүртэлх насны хүүхэд ердөө 2.13 сая байна. 2025 онд шинээр төрсөн хүүхдийн тоо 705 809 болж, дахин түүхэн доод хэмжээнд хүрсэн бөгөөд энэ үзүүлэлт 10 дахь жилдээ дараалан буурчээ.

Японы Засгийн газар 2030 он хүртэлх хугацааг “хүн ам зүйн энэ байдлыг өөрчлөх сүүлчийн боломж” хэмээн зарлаж, хүүхэдтэй гэр бүлүүдэд үзүүлэх санхүүгийн дэмжлэгийг үе шаттайгаар нэмэгдүүлж байгаа юм. Гэсэн ч авч хэрэгжүүлж буй арга хэмжээнүүдийн үр дүнд хүүхдийн тоо буурсан хэвээр байна.

НҮБ-ын мэдээгээр, 40 саяас дээш хүн амтай дэлхийн 38 орноос Япон улс хүүхдийн эзлэх хувиар сүүлээсээ хоёрдугаарт орж байна. Хамгийн сүүлчийн байрт БНСУ (10.2 хувь) бичигджээ.

Эх сурвалж: Kyodo