Вашингтон хотын төвд 15-р гудамж болон Тусгаар тогтнолын өргөн чөлөөний уулзвар дээр буудалцаан болсон тухай АНУ-ын төрийн өндөр албан тушаалтнуудын аюулгүй байдлыг хариуцдаг Нууц алба даваа гарагт мэдээлжээ.
"Хууль сахиулах байгууллагын ажилтнууд нэг хүнийг буудаж шархдуулсан. Түүний биеийн байдал одоогоор тодорхойгүй байна" гэж тус алба X (хуучнаар Twitter) нийгмийн сүлжээний хуудсандаа мэдэгджээ. Хэргийн газарт яаралтай тусламжийн багууд ирсэн байна.
Уг хэрэг Цагаан ордон болон Капитолын ордноос холгүй орших Вашингтоны хөшөөний орчимд гарчээ. Цагаан ордны хэвлэлийн албанаас мэдээлснээр, тухайн үед АНУ-ын Ерөнхийлөгч өөрийн өргөөнд жижиг бизнесийн асуудлаар зөвлөгөөн хийж байсан байна. Хэрэг гарсан уулзвар нь Цагаан ордноос ойролцоогоор 1 км зайд оршдог ажээ.
Хэрэг гарах үеэр Цагаан ордныг түр хугацаанд хаажээ. Нууц албаны ажилтнууд гадаа байсан сэтгүүлчдийг хэвлэлийн бага хурлын танхим руу оруулсан байна. Д.Трамп завсарлага авалгүйгээр илтгэлээ үргэлжлүүлсэн гэж Associated Press агентлаг мэдээлсэн байна.
Колумбийн тойргийн Гал түймэртэй тэмцэх болон түргэн тусламжийн газраас мэдээлснээр, насанд хүрсэн нэг эрэгтэйг эмнэлэгт хүргэж, мөн хөнгөн гэмтсэн өсвөр насны хүүхдэд тусламж үзүүлжээ.
Цагдаагийн бүрэлдэхүүн хэргийн газарт ажиллаж байгаа тухай тус тойргийн Цагдаагийн газраас мэдээлсэн байна. "Хэргийн газрыг хамгаалалтад авсан байна. Ойролцоох замууд хэдэн цагийн турш хаагдах тул энэ бүсээр зорчихгүй байхыг зөвлөж байна" гэж цагдаагийн газар мэдэгджээ.
