2021 оны хоёрдугаар сараас хойш хоригдож байгаа Мьянмарын удирдагч асан, Нобелийн энх тайвны шагналт Аун Сан Су Чиг шоронгоос гэрийн хорионд шилжүүлсэн тухай тус улсын төрийн мэдээллийн хэрэгслүүд цэргийнхний мэдэгдлээс эш татан мэдээлжээ.
Өдгөө 80 настай Аун Сан Су Чи таван жилийн өмнө гарсан цэргийн эргэлтийн дараа албан тушаалаасаа огцорсноосоо хойш хоригдож байгаа юм.
Төрийн эргэлтийг зохион байгуулсан цэргийн хунтын удирдагч Мин Аун Хлайны мэдэгдэлдээ "түүний үлдсэн хорих хугацааг тогтоосон оршин суугаа газарт эдлүүлэхээр шийдвэрлэсэн" гэж дурдсан байна.
Аун Сан Су Чи 2015 онд Мьянмарт ардчилсан шинэчлэл явагдсаны дараа засгийн эрхэнд гарсан юм. Үүнээс өмнө тэрбээр ардчиллын төлөөх тэмцэгч гэдгээрээ дэлхийд танигдаж, 15 гаруй жилийг гэрийн хорионд өнгөрүүлж байсан билээ.
Мьянмарын төрийн мэдээллийн хэрэгслүүдээр түүнийг дүрэмт хувцастай хоёр цэргийн дунд сууж буй гэрэл зургийг үзүүлсэн боловч уг зургийг хэзээ авсан нь тодорхойгүй байна.
Аун Сан Су Чигийн өмгөөлөгчид түүнийг гэрийн хорионд шилжүүлсэн шийдвэрийг сайшаасан байна. "Аун Сан Су Чи таван жил гаруйн турш Бирмийн шоронгуудад "там шиг" амьдралыг тууллаа. Бид түүний нөхцөл байдал өөрчлөгдсөнийг сайшааж байгаа хэдий ч тэрбээр шударга бусаар, үндэслэлгүйгээр эрх чөлөөгөө хасуулсан хэвээр байна" гэж түүний өмгөөлөгчид мэдэгджээ.
Харин түүний хүү Ким Арис цэргийнхний мэдэгдэлд эргэлзэж байгаагаа хэлээд, түүнд ээжийгээ эсэн мэнд байгааг нотлох баримт байхгүй гэж мэдэгджээ. Олон нийтэд үзүүлсэн гэрэл зургийг 2022 онд авсан гэж тэрбээр хэлсэн байна.
Аун Сан Су Чигийн эрүүл мэндийн байдал болон хоригдож буй нөхцөлийн талаарх мэдээллийг өнөөдрийг хүртэл нууцалсаар ирсэн юм. Ким Арис ээжээсээ мэдээ авалгүй олон жил болсон тухайгаа өнгөрсөн оны 12 дугаар сард ярьж байжээ. Өмгөөлөгчид нь түүнийг гурван жил гаруй хугацаанд харж чадаагүй бол гэр бүлийнхэн нь хоёр жил гаруй хугацаанд ямар ч харилцаа холбоогүй байсан байна.
