Арабын Нэгдсэн Эмират улс тавдугаар сарын нэгнээс эхлэн Газрын тос экспортлогч улсуудын байгууллагаас /ОПЕК ба ОПЕК+/ гарч байгаа тухай тус улсын мэдээллийн WAM агентлаг болон Ройтерс агентлаг мэдээллээ.

“АНЭУ-ын үйлдвэрлэлийн бодлого, одоогийн ба ирээдүйн хүчин чадалд бүх талын дүн шинжилгээ хийсний үндсэн дээр энэхүү шийдвэрийг гаргалаа. Энэ нь манай улсын үндэсний эрх ашиг ба зах зээлийн эрэлт хэрэгцээг хангахад тодорхой хувь нэмэр оруулах эрмэлзэлд үндэслэсэн шийдвэр мөн” гэж WAM агентлагийн мэдээлэлд дурдсан байна. Энэхүү шийдвэр нь тус улсын урт хугацааны стратегийн ба эдийн засгийн бодлого, эрчим хүчний салбарт гарч буй өөрчлөлтүүдийг тусгаж байгаа ажээ.

ОПЕК-ээс гарсны дараа АНЭУ зах зээлийн эрэлт хэрэгцээ, нөхцөл байдалд тохируулан нэмэлт бүтээгдэхүүнийг сайтар цэгнэсний үндсэн дээр аажмаар нийлүүлэх бөгөөд хариуцлагатайгаар ажиллах болно гэж тус улсын эрх баригчид мэдэгдлээ. Цаашдаа тус улс газрын тос, хий, сэргээгдэх эрчим хүч зэрэг эрчим хүчний сүлжээний бүх салбар нэгжид үргэлжлүүлэн хөрөнгө оруулна гэдгийг мөн мэдэгдсэн байна.  

АНЭУ-ын Эрчим хүчний сайд Сухейль аль-Мазруи Ройтерс агентлагт ярилцлага өгөхдөө, ОПЕК-оос гарах шийдвэрийг гаргахдаа Саудын Араб зэрэг улсуудтай урьдчилан зөвлөлдөөгүй гэдгээ дурджээ.

Rystad Energy компанийн шинжээч Хорхе Леон-ы үзэж байгаагаар, АНЭУ бол нефтийн ихээхэн нөөцтэй ОПЕК-ийн гишүүн цөөхөн улсуудын нэг учраас энэхүү шийдвэр нь ОПЕК болон түүний тэргүүлэгч улс болох Саудын Арабын хувьд хүнд цохилт болно.  Одоогоор Ормузын хоолой хаалттай байгаа учраас энэ шийдвэрийн үр дагавар төдийлөн мэдрэгдэхгүй, гэхдээ урт хугацаандаа ОПЕК бүтцийн хувьд суларна гэж шинжээч дүгнэсэн байна.  

АНЭУ 1967 онд Абу-Дабигийн эмират гэсэн бүтэцтэйгээр ОПЕК-т элссэн бөгөөд 1971 онд тус улс байгуулагдсаны дараа гишүүнчлэлээ хэвээр хадгалж үлдсэн байна. 

Эх сурвалж: DW