Ерөнхийлөгч Д.Трамп сэтгүүлчдийн хамт оройн зоог барих үеэр зэвсэгт халдлага үйлдсэн 31 настай Коул Алленыг “АНУ-ын Ерөнхийлөгчийн амь насанд халдахаар завдсан” хэрэгт буруутгаж байгаагаа Вашингтон дахь Холбооны шүүх мэдэгдлээ.
Калифорни муж улсын Торранс хотын оршин суугч тэрбээр гэм буруутай нь шүүхээр тогтоогдвол бүх насаараа хоригдох ялаар шийтгүүлэх юм.
Мөн Алленыг “хүчирхийллийн гэмт хэрэг үйлдэх явцад галт зэвсэг хэрэглэсэн”, “төрийн алба хаагч руу зэвсэгт халдлага үйлдсэн” гэх хоёр зүйл ангиар буруутгасан байна. Шүүхэд болсон эхний сонсголын явцад тэрбээр өөрийгөө гэмт буруутай болохыг хүлээн зөвшөөрөөгүй боловч буруугүй гэж мэдэгдээгүй ажээ.
Прокурор Жоселин Баллантины мэдэгдсэнээр, Аллен халдлага үйлдэхдээ 12 калибрын шахуурган буу, 3 ширхэг хутга хэрэглэсэн байна.
Халдлагын тухайд сануулан дурдахад, энэ сарын 25-ны орой “Вашингтон Хилтон” зочид буудалд АНУ-ын Ерөнхийлөгч Д.Трамп сэтгүүлчдийн хамт зоог барих үеэр 5-8 удаа буун дуу гарсан байна. Халдлага үйлдэгч этгээд зочид буудал руу нэвтрэхийн тулд металл илрүүлэгч төхөөрөмжний ойролцоо зогсож байхдаа гал нээж, нэг сум нууц албаны ажилтныг оносон боловч сум нэвтэрдэггүй хантаазтай байсан тул аврагджээ. К.Алленыг дайллага болж байсан танхимын үүдэнд баривчлан саатуулсан байна. Танхимд байсан Ерөнхийлөгч, тэргүүн хатагтан Меланиа болон засгийн газрын гишүүдийг аюулгүй газарт аваачжээ.
Д.Трамп өөрийн Truth Social нийгмийн сүлжээндээ баривчлагдсан этгээдийн гэрэл зургийг нийтэлсэн байна. Сэжигтэн Коул Томас Аллен Калифорнийн Технологийн их сургуулийг механик инженерийн мэргэжлээр 2017 онд төгссөн бөгөөд тэргэнцрийн яаралтай тоормосны загвар зохион бүтээжээ. Мөн тэрбээр C2 Education компанид сургагчаар ажиллаж, 2024 оны 12 дугаар сард “Сарын шилдэг багш”-аар шалгарч байсан гэнэ.
Ням гарагт Ерөнхийлөгч Д.Трамп халдлага үйлдэгчийн талаар хэлэхдээ, “христийн шашны эсрэг үзэл бодолтой, сэтгэцийн хувьд эрүүл биш хүн” гэж тодорхойлжээ. Аллены гэр бүлийнхэн түүний сэтгэцийн асуудлыг мэдэж байсан бөгөөд хууль сахиулах байгууллагуудад гомдол гаргаж байсан тухай Д.Трамп яриад “түүний талаар илүү шийдмэг тодорхой мэдээлэх ёстой байсан юм” гэв.
