Болгарчууд өнөөдөр сүүлийн таван жилийн хугацаанд найм дахь удаагаа болж буй парламентын сонгуульд саналаа өгч байна.

Энэ удаагийн сонгуульд Оросыг дэмжигч ерөнхийлөгч асан Румен Радев ялах магадлал өндөр байгаа бөгөөд тэрбээр сул дорой, богино настай засгийн газрууд ээлж дараалан байгуулагдаж байгаа явдлыг зогсоож, газар авсан авилгатай тэмцэнэ гэж амлажээ.

Европын холбоонд шүүмжлэлтэй ханддаг, сөнөөгч онгоцны нисгэгч асан Р.Радев нь Оростой хийж буй дайнд Украинд цэргийн дэмжлэг үзүүлэхийг эсэргүүцдэг бөгөөд тэрбээр сонгуульд нэр дэвшихийн тулд нэгдүгээр сард ерөнхийлөгчийн албан тушаалаасаа огцорсон байна. Энэ удаагийн ээлжит бус сонгууль өнгөрсөн оны 12 дугаар сард олон нийтийн эсэргүүцлийн жагсаалын улмаас өмнөх засгийн газар огцорсны дараа болж байгаа юм.

Нийгмийн сүлжээн дэх чадварлаг сурталчилгаа, их хэмжээний санхүүжилт болон тогтвортой байдлыг амласан нь 6.5 сая орчим хүн амтай Балканы энэ улсад Р.Радевын дэмжлэгийн түвшнийг нэмэгдүүлжээ. Болгарын сонгогчид ойр ойрхон болж буй ээлжит бус сонгуулиудаас, мөн авилгад идэгдсэн гэж үзэж буй хэсэг бүлэг хуучин улстөрчдөөс залхсан байна.

Тус улс нэгдүгээр сараас еврог үндэсний мөнгөн тэмдэгтээ болгон хэрэглэж эхэлснээс хойш амьжиргааны өртөг гол асуудал болоод байна. Өмнөх засгийн газар татварыг нэмэх, нийгмийн даатгалын шимтгэлийг өсгөхийг тусгасан төсвийг эсэргүүцсэн жагсаалын улмаас унасан юм. 

Энэ нь сонгогчдын хувьд Москватай харилцаагаа сайжруулах эсвэл Оросын нефть, хийн нийлүүлэлтийг Европ руу сэргээх тухай Радевын уриалгуудаас илүү чухал асуудал болж байгаа бололтой. “Би улс төрд шинээр гарч ирж буй энэ генералыг дэмжинэ. Шинэ зүйл байвал бид туршиж үзэх хэрэгтэй” гэж өсөн нэмэгдэж буй амьжаргааны өртөгт санаа зовж буй 37 настай төрийн албан хаагч Георги Божков хэллээ.

Баасан гаригт явуулсан санал асуулгаар Радевын “Прогрессив Болгар” нам 35 орчим хувийн дэмжлэг авсан нь сарын өмнөхөөс өсжээ. Хэрэв сонгуулийн дүн ингэж гарвал нэг нам сүүлийн жилүүдэд үзүүлж байгаагүй хамгийн өндөр амжилтуудын нэг болох ч парламентад олонхыг бүрдүүлж чадахгүй юм.

Энэ удаагийн сонгуулиар парламентын 240 суудлын төлөө 14 улс төрийн нам болон 10 эвслийн төлөөлөгчид өрсөлдөж байна. Сонгуулийн төв комиссоос мэдээлснээр, нийт 4 786 нэр дэвшигч парламентын гишүүний суудлын төлөө өрсөлдөж байгаа аж.

 Reuters