Ирэх дөрвөн жилийн хугацаанд нэг тэрбум хүнийг ундны усны найдвартай эх үүсвэрээр хангах зорилготой “Water Forward” санаачилгыг Дэлхийн банк болон олон улсын хөгжлийн бусад зээлдүүлэгч лхагва гарагт албан ёсоор эхлүүлжээ.
Уг хөтөлбөр нь усны менежментийн хөрөнгө оруулалтыг нэмэгдүүлэх, усыг хямд өртөгтэй нийтийн үйлчилгээ биш, харин эдийн засгийн стратегийн чухал нөөц гэдэгт улс орнуудын засгийн газруудын анхаарлыг хандуулах зорилготой байна.
“Ус бол эдийн засгийн үйл ажиллагааны үндэс суурь юм. Одоо бидний эн тэргүүний зорилт бол усны найдвартай үйлчилгээг өргөн хүрээнд хүргэх явдал юм” гэж Дэлхийн банкны ерөнхийлөгч Ажай Банга мэдэгдэлдээ дурджээ.
Тус банкны тооцоолсноор, энэ арван жилийн эцэс гэхэд цэвэр дэлхийн усны эрэлт нийлүүлэлтээсээ 40 хувиар давах төлөвтэй байгаа бөгөөд усны нөөцтэй холбоотой хямрал нь зарим орны эдийн засгийн өсөлтийг саатуулаад эхэлсэн байна.
“Water Forward” хөтөлбөрийн эхний шатанд Африк, Ойрх Дорнод, Өмнөд Азийн усны хомсдолд орсон 14 улсыг хамруулах юм. Ингэхдээ хотуудын усны алдагдлыг бууруулах, усжуулалтын системийг шинэчлэх, бохир усны дахин ашиглалтыг сайжруулах болон өгөгдөлд суурилсан төлөвлөлтийг өргөжүүлэх төслүүдийг эн тэргүүнд хэрэгжүүлэх ажээ.
Дэлхийн банк 2030 он гэхэд 400 сая хүнийг усны аюулгүй байдлаар хангах үүрэг хүлээсэн бол бусад түншүүдийн оролцоотойгоор дээрх хөтөлбөр нэг тэрбум гаруй хүнийг хамарна.
Эх сурвалж: Reuters
