Ираны Гадаад хэргийн дэд сайд Саид Хатибзаде BBC агентлагт өгсөн ярилцлагадаа, лхагва гарагт Израилийн зүгээс Ливанд өгсөн цохилтууд нь АНУ болон Ираны хооронд байгуулсан гал зогсоох хэлэлцээрийг "ноцтой зөрчсөн" үйлдэл боллоо гэж мэдэгдэв. Тэрээр Израилийг Ливанд "хядлага" үйлдэж байна хэмээн буруутгасан бөгөөд Ливаны Эрүүл мэндийн яамны мэдээлснээр тус улс даяар 203 хүн амь үрэгдэж, 1000 гаруй хүн шархаджээ.

Ливаны Ерөнхийлөгч Жозеф Аун энэхүү халдлагыг "хядлага" гэж нэрлэсэн бөгөөд засгийн газраас амь үрэгдэгсдийн дурсгалыг хүндэтгэх гашуудлын өдөр зарласан байна. Бейрут хотын баруун хэсэгт байрлах 10 давхар орон сууцны барилга Израилийн агаарын цохилтод өртөн нурсан бөгөөд нуранги доороос амьд хүн олох найдвар тасарсан талаар аврах багийнхан мэдээлжээ.

АНУ болон Иран улсууд мягмар гарагийн орой гал зогсоох тохиролцоонд хүрснээ зарласан боловч гэрээний нөхцөлүүдийн талаар зөрчилдөөнтэй мэдээллүүд гарсаар байна. АНУ-ын Ерөнхийлөгч Дональд Трамп Ираныг "жинхэнэ" гэрээний нөхцөлийг бүрэн биелүүлэх хүртэл АНУ-ын зэвсэгт хүчин бүс нутагтаа байрласан хэвээр байх болно гэж мэдэгдэв. Түүнчлэн гэрээнд цөмийн зэвсгээс татгалзах, Ормузын хоолойг нээх асуудал багтсан гэж тэрээр онцолсон юм. Гэвч Ираны зүгээс АНУ "түрэмгийлэл"-ээ зогсоосон тохиолдолд л Ормузын хоолойг нээнэ гэж мэдэгдсэн бөгөөд одоогоор тус хоолой хаалттай хэвээр байгааг хөлөг онгоцуудад анхааруулжээ.

Израилийн Ерөнхий сайд Бенжамин Нетаньяху гал зогсоох хэлэлцээрт Ливан улс багтаагүй гэж үзэж байгаа бөгөөд "шаардлагатай газар бүрт" Хезболла бүлэглэлд цохилт өгсөөр байх болно гэдгээ анхааруулав. Их Британийн Батлан хамгаалахын сайд Жон Хили Ливан дахь хурцадмал байдлыг буруушааж, мөргөлдөөнийг гал зогсоох гэрээний хүрээнд шийдвэрлэхийг уриалсан байна. Мөн Их Британийн Ерөнхий сайд Кир Стармер Персийн булангийн холбоотнууддаа хандан Иран улс Ормузын хоолойг барьцаалах ёсгүйг сануулжээ. Франц улс мөн Израилийн Ливан дахь цохилтыг "хүлээн зөвшөөршгүй" хэмээн буруушаасан байна.

Ойрхи Дорнодын нөхцөл байдал, Ормузын хоолойн тодорхойгүй байдлаас үүдэн дэлхийн зах зээл дээр газрын тосны үнэ өсөж эхэллээ. Пүрэв гарагт Brent маркийн газрын тосны үнэ 2.7 хувиар өсөж, нэг торх нь 97.23 ам.долларт хүрсэн бол Ази, Европын хөрөнгийн зах зээлийн индексүүд уналттай байна.