БНАСАУ-ын удирдагч Ким Жөн Уны залгамжлагчаар түүний өсвөр насны охин Ким Жү Э тодорсон гэж Өмнөд Солонгосын тагнуулын байгууллага үзэж байгаа тухай тус улсын хууль тогтоогчид даваа гарагт мэдэгдсэн байна.
Өнөөдөр болсон парламентын хаалттай хуралдааны үеэр тагнуулын байгууллагаас өгсөн мэдээллээс эш татан эрх баригч болон сөрөг хүчний гишүүд энэ талаар сэтгүүлчдэд мэдээлжээ.
Тагнуулын албаныхны дүгнэлтээр, Ким Жү Э саяхан танк жолоодож буй дүрс бичлэгийг олон нийтэд үзүүлсэн нь түүний цэргийн чадварыг харуулах, улмаар залгамжлагчийн талаарх аливаа эргэлзээг арилгах зорилготой байжээ. БНСУ-ын Тагнуулын алба энэхүү дүгнэлтээ зөвхөн шууд нотлох баримтад бус харин өөрсдийнх нь цуглуулсан “найдвартай тагнуулын мэдээ баримт”-д үндэслэсэн гэж мэдэгдсэн байна.
13 орчим настай байж магадгүй Ким Жү Э охины талаарх энэхүү сүүлийн үеийн дүгнэлт нь тагнуулын байгууллагын өмнөх дүгнэлтээс нэг шатаар ахисан дүгнэлт болж байна. Өмнөд Солонгосын тагнуулууд өмнө нь түүнийг эцгийнхээ халааг авахаар бэлтгэгдэж байж магадгүй гэж мэдээлж байсан юм.
