Хагас зуун жилийн дараа сар руу хүн нисгэж буй НАСА-гийн "Артемис II" (Artemis II) сансрын хөлөг амжилттай хөөрч, дэлхийн тойрог замд орлоо. Хөлгийн багийн ахлагч Рид Уайсман хөөрөх үедээ "Бид бүх хүн төрөлхтний төлөө нисэж байна" хэмээн хэлсэн бөгөөд пуужин хөөрөх мөч үнэхээр гайхалтай байсныг сурвалжлагчид онцолж байна.

Одоогоор "Орион" (Orion) сансрын хөлөг дэлхийн тойрог замд байгаа бөгөөд багийнхан 24 цагийн турш хөлгийн системүүдээ шалгах юм. Бүх зүйл хэвийн байвал сар руу чиглэсэн замналдаа орно. НАСА-гийн албаны хүний мэдээлснээр сансрын нисгэгчид "аюулгүй, найдвартай, маш өндөр сэтгэл санаатай" байгаа аж. Тэд 10 өдрийн турш үргэлжлэх энэхүү даалгаврынхаа үеэр саран дээр газардахгүй ч сарыг тойрон нисэх бөгөөд хүн төрөлхтний түүхэнд дэлхийгээс хамгийн хол зайд аялсан хүмүүс болох юм.

"Артемис II" хөлгийн багт дөрвөн сансрын нисгэгч багтсан. Багийн ахлагч Рид Уайсман нь АНУ-ын Тэнгисийн цэргийн нисгэгч асан бол хөлгийн нисгэгч Виктор Гловер нь сар руу ниссэн анхны өнгөт арьст сансрын нисгэгч болж байна. Мөн задгай сансарт хамгийн удаан хугацаагаар ажилласан эмэгтэй гэх дээд амжилтыг эзэмшдэг Кристина Кох сарыг тойрох анхны эмэгтэй болох бол Канадын иргэн Жереми Хансен сар руу ниссэн анхны канад хүн болж түүхэнд бичигдэж байна.

Сансарт татах хүчгүй байдаг нь олон сорилтыг дагуулдгийн нэг нь бие засах асуудал юм. НАСА үүнийг шийдвэрлэхийн тулд 23 сая гаруй ам.доллар зарцуулж "Бүх нийтийн хог хаягдлын менежментийн систем"-ийг бүтээжээ. Мөн нислэгийн хамгийн эрсдэлтэй үеүдэд сансрын нисгэгчид амьдрах орчныг тэтгэх систем бүхий тусгай улбар шар өнгийн хувцас өмсөх бөгөөд энэ нь онцгой байдлын үед тэднийг зургаа хоног хүртэл амьд байлгах зориулалттай юм.

Энэхүү нислэг нь 1969 оны "Аполло" хөтөлбөрөөс хойш сар руу чиглэсэн хүний оролцоотой хамгийн том алхам болж байна. "Артемис II" амжилттай болсноор 2028 онд хэрэгжих "Артемис IV" хөтөлбөрийн хүрээнд хүн төрөлхтөн дахин саран дээр хөл тавих, цаашлаад сарны тойрог замд сансрын станц байгуулах, Ангараг гариг руу аялах томоохон үүд хаалгыг нээх юм.