АНУ-ын засаг захиргаа Ойрх Дорнод руу 3 500 цэргийн алба хаагчаа илгээж буй энэ үед Ираны тал АНУ-ын явуулж болзошгүй хуурай замын цэргийн ажиллагаанд бэлэн гэдгээ мэдэгджээ. Үүний зэрэгцээ талууд мөргөлдөөнийг зогсоох хэлэлцээний талаар зөрүүтэй мэдээллүүдийг өгсөөр байна.

“Манай цэргүүд АНУ-ын цэргүүдтэй хуурай замаар тулалдахад бэлэн байна" гэж Ираны парламентын дарга Мохаммад-Багер Галибаф мэдэгдээд, Вашингтоныг дипломат яриа хэлэлцээ хийхийн хажуугаар хуурай замаар довтлохоор төлөвлөж байна” гэж буруутгасан байна. Тэрбээр мэдэгдэхдээ, Иран улс "бууж өгөх" хэмжээний ямар ч нөхцөлийг хүлээж авахгүй гээд, нөхцөл байдлыг даамжруулсан аливаа ажиллагааны хариуд арга хэмжээ авна гэдгийг анхааруулжээ.

Хэдийгээр одоогоор эцсийн шийдвэр гараагүй байгаа ч АНУ-ын Батлан хамгаалах яамны албан тушаалтнууд хуурай замын цэргийн ажиллагааг хязгаарлагдмал хүрээнд явуулах хувилбаруудыг хэлэлцэж байгаа тухай мэдээлэл гарсны дараа Ираны парламентын дарга дээрх мэдэгдлийг хийжээ. Цагаан ордноос мэдэгдэхдээ, цэргийн ажиллагааг төлөвлөх нь стандарт ажиллагааны нэг хэсэг бөгөөд цэргийн ажиллагааг шууд эхлүүлнэ гэсэн үг биш болохыг тайлбарласан байна.

Үүний зэрэгцээ АНУ Ойрх Дорнодод цэргийн хүчээ зузаатгаж байна. Тус улсын Төв командлалаас мэдээлснээр, нисэх онгоц болон десантын техник хэрэгслүүд бүхий нэмэлт хүч Ойрх Дорнодод очсон байна. 3 500 орчим цэрэг илгээх төлөвлөгөөний хүрээнд мөн десантын цэргийн "USS Tripoli" хөлөг онгоц бүс нутаг иржээ.

АНУ-ын албаныхан мөргөлдөөнийг дипломат арга замаар шийдэх хүчин чармайлт үргэлжилж байгааг мэдэгджээ. Төрийн нарийн бичгийн дарга Марко Рубио мэдэгдэхдээ, Ираны тал санал болгож буй энхийн хэлэлцээрт албан ёсоор хариу өгөөгүй байгаа боловч зарим асуудлаар харилцан ойлголцох шинж тэмдэг ажиглагдаж байгааг дурдсан байна.