АНУ-ын Лос Анжелес болон Нью Мексико мужийн тангарагтны шүүхүүд нийгмийн сүлжээний аварга компаниуд болох Meta болон YouTube-ийг хүүхэд, өсвөр үеийнхэнд хор хөнөөл учруулсан буруутай хэмээн үзэж, анх удаа түүхэн шийдвэр гаргалаа. Олон жилийн турш эцэг эхчүүд болон хүүхдийн эрхийг хамгаалагчдын хөндөж ирсэн "сошиал медиа донтуулагч бөгөөд хүүхдэд аюултай" гэх асуудлыг шүүх ийнхүү албан ёсоор баталгаажуулсан байна.

Лос Анжелесийн шүүхээс Meta болон YouTube-ийг залуу хэрэглэгчдийг донтуулах зорилгоор платформоо загварчилсан гэж буруутгасан бол, Нью Мексико мужид Meta-г хүүхдийн сэтгэцийн эрүүл мэндэд санаатайгаар хор хөнөөл учруулсан, бэлгийн мөлжлөгийг мэдсээр байж нуун дарагдуулсан хэрэгт буруутай гэж үзжээ. Энэхүү шийдвэр нь технологийн компаниудыг зөвхөн хэрэглэгчдийн оруулсан контентод бус, харин өөрсдийн бүтээсэн алгоритм, дизайны шийдэлдээ хариуцлага хүлээх ёстойг харуулсан анхны тохиолдол болж байна. Өмнө нь эдгээр компаниуд хуулийн заалтаар хамгаалагдаж, хэрэглэгчийн контентод хариуцлага хүлээхээс мултардаг байсан юм.

Шүүхийн энэхүү шийдвэрийг хүүхдийн эрхийг хамгаалагчид "Технологийн аваргуудын ялагдашгүй эрин үе төгслөө" хэмээн баяртайгаар хүлээж авсан бол, Meta болон Google (YouTube) компаниуд эсэргүүцэж, давж заалдахаа мэдэгджээ. Шүүхийн маргаан эцсийн үр дүнд хүрэхэд олон жил шаардагдаж магадгүй ч нийгмийн сүлжээний компаниудын эсрэг олон нийтийн хандлага эрс өөрчлөгдөж эхэлсний тод дохио энэ боллоо. Цаашид технологийн хөгжил зогсохгүй тул хиймэл оюун ухаанд суурилсан чатботууд нь хүүхдийн аюулгүй байдлыг хангах дараагийн томоохон сорилт болно гэдгийг судлаачид анхааруулж байна.

Эх сурвалж: cbs19news