Дэлхийн хотуудын агаарын чанарын талаарх саяхан гаргасан IQAir тайланд дурдсанаар хамгийн их агаарын бохирдолтой хот Энэтхэгт байна.

Агаарын бохирдлын мониторинг хийдэг Швейцарын IQAir компани дэлхийн 143 улсын 9446 хотын агаарын чанарт дүн шинжилгээ хийж, World Air Quality Report 2025 тайлангаа танилцууллаа.

Дэлхийн хотуудын ердөө 14 хувийнх нь оршин суугчид аюулгүй агаараар амьсгалдаг ажээ. Энэ нь өнгөрсөн оныхоос гурван пунктээр доогуур үзүүлэлт юм.

Хүний үйл ажиллагаанаас үүдэлтэй уур амьсгалын өөрчлөлтийн улмаас агаарын чанар муудаж байгааг Швейцарын шинжээчид онцолжээ. Ялангуяа 2025 онд дэгдсэн олон удаагийн ойн түймрийн утаа болон шороон шуурга, ашигт малтмалыг шатааснаас үүдэлтэй утаа нь үүнд хамгийн ихээр нөлөөлжээ.

Агаар нь аюулгүй гэсэн шалгуурт тэнцэх улсууд Европт ердөө гуравхан байгаа нь Андорра, Эстони, Исланд юм. Эдгээр улсад PM2.5 буюу агаар дахь нарийн ширхэгт тоосонцрын хэмжээ нь ДЭМБ-ын тогтоосон хүлцэх хэмжээнээс даваагүй байна. Казахстаны Алматы хот агаар нь хамгийн ихээр бохирдсон хотуудын жагсаалтын 55 дугаарт бичигдсэн байна.

Тайланд дурдсанаар, дэлхийн ердөө 13 улс ба нутаг дэвсгэрт агаарын чанар аюулгүй түвшинд байсан бөгөөд энэ жагсаалтад дээрх гурван улсаас гадна Австрали, Барбадос, Бермудын арлууд, Францын Полинез, Гренада, Шинэ Каледони, Панам, Пуэрто-Рико, АНУ-ын Реюньон ба Виржинийн арлууд оржээ. Өөрөөр хэлбэл, тайланд дурдагдсан 143 улсаас 130-д нь агаарын бохирдол аюултай түвшинд хүрчээ гэсэн үг. Тодруулбал, хамгийн ихээр агаар нь бохирдсон 5 улсын тоонд Пакистан /нэг шоо метр агаар дахь жижиг нарийн хатуу хэсгүүд 67,3 микрограмм/ Бангладеш /66,1/, Тажикистан /57,3/, Чад /53,6/, БНАрдчилсан Конго улс /50,2/ оржээ

IQAir компани мөн бодит цагийн горимоор агаарын чанарын мониторинг хийж, шуурхай жагсаалтыг нийтэлдэг. Тайланг бэлтгэж байх мөчид дэлхийн хамгийн их бохирдолтой 5 хотын тоонд Парис, Бээжин, Дакка, Ухань, Сөүл орсон бол Лондон хот эхний 10-т бичигдсэн байна.

Эх сурвалж: Kazinform