Жил бүр Канад болон Америкийн Нэгдсэн Улсад "Ягаан өдөр" буюу дээрэлхэлт, ялгаварлан гадуурхалтын эсрэг өдрийг тэмдэглэдэг уламжлалтай. Энэ өдөр нь хүмүүс ягаан өнгийн хувцас өмсөн эв санааны нэгдлээ илэрхийлж, сургуулийн болон нийгмийн орчин дахь дээрэлхэлтийг таслан зогсоохыг уриалдгаараа онцлог юм.

Ягаан өдрийг анх 2007 онд Канад улсын Нова Скотиа мужид санаачилсан байна. Тухайн үед нэгэн сурагч ягаан өнгийн цамц өмссөнийхөө төлөө ангийнхаа хүүхдүүдэд дээрэлхүүлжээ. Үүнийг харсан ахлах ангийн хоёр сурагч болох Дэвид Шеперд, Трэвис Прайс нар бусад сурагчдыг ягаан өнгийн хувцас өмсөхийг уриалж, дээрэлхэлтийн эсрэг эв нэгдлийн хөдөлгөөн өрнүүлсэн байна.

Маргааш нь сургуулийн олон зуун сурагч ягаан өнгийн хувцастай ирснээр дээрэлхэлт зогсож, уг санаачилга богино хугацаанд Канад даяар, улмаар дэлхий дахинд түгэн тархжээ.

Өнөөдөр Ягаан өдрийг Канад улсад жил бүрийн хоёрдугаар сарын сүүлийн лхагва гарагт тэмдэглэдэг бол АНУ болон бусад орнуудад сургуулиуд, байгууллагууд өөрсдийн онцлогоос хамааран зохион байгуулдаг байна.

Судалгаагаар дэлхий даяар гурван хүүхэд тутмын нэг нь сургуулийн орчинд дээрэлхэлтэд өртдөг бөгөөд цахим орчны дарамт, ялгаварлан гадуурхалт нэмэгдэх хандлагатай байгаа талаар олон улсын байгууллагууд анхааруулж байна. Иймээс Ягаан өдөр нь хүүхэд, залуусын аюулгүй орчныг бүрдүүлэх, харилцан хүндэтгэлтэй соёлыг төлөвшүүлэхэд чухал ач холбогдолтой гэж үздэг.

Энэ өдөр сургууль, байгууллагууд дээрэлхэлтийн эсрэг сургалт, хэлэлцүүлэг, олон нийтийн арга хэмжээ зохион байгуулж, хүүхэд залуусыг бие биедээ хүндэтгэлтэй хандахыг уриалдаг байна.

Ягаан өдөр нь зөвхөн нэг өдрийн арга хэмжээ биш, харин дээрэлхэлтгүй, ялгаварлан гадуурхалтгүй нийгмийг бий болгоход хүн бүрийн оролцоо чухал гэдгийг сануулдаг өдөр болжээ.