Хойд Лондонгийн Голдерс Грин дүүрэгт еврей нийгэмлэгийн түргэн тусламжийн үйлчилгээний дөрвөн автомашиныг шатаасан бөгөөд цагдаа нар уг хэргийг антисемит (еврейчүүдийг үзэн ядах) сэдэлтэй үзэн ядах гэмт хэрэг хэмээн шалгаж байгаагаа мэдэгдэв.

Их Британийн Ерөнхий сайд Кир Стармер үүнийг Лондонгийн еврей нийгэмлэгийн эсрэг чиглэсэн цочирдом халдлага хэмээн буруушаасан бол хотын дарга Садик Хан хулчгар үйлдэл гэж нэрлэжээ. Их Британийн тэргүүн раввин Сэр Эфраим Мирвис уг хэргийг "Зөвхөн еврей нийгэмлэг төдийгүй бидний нийгмийн нийтлэг үнэт зүйлсэд халдсан жигшүүрт хэрэг" хэмээн тодорхойлсон байна.

Антисемитизмийг хянаж, Их Британийн еврей нийгэмлэгийн аюулгүй байдлыг хангадаг "Community Security Trust" буяны байгууллагын төлөөлөгч Марк Гарднер энэ нь еврейчүүдийн эсрэг төдийгүй бүхэл бүтэн Их Британийн эсрэг хийсэн халдлага байлаа гэж мэдэгдэв.

Ерөнхий сайд Стармер "Энэ бол гүнээ цочирдуулсан антисемит галдалт байлаа. Өнөө өглөө энэхүү аймшигт мэдээг сонсож сэрсэн еврей нийгэмлэгийнхэнтэй миний сэтгэл зүрх хамт байна. Бидний нийгэмд антисемитизм орших ёсгүй. Ямар нэгэн мэдээлэлтэй хүн байвал цагдаад хандах хэрэгтэй" гэжээ.

Хотын дарга Хан "Энэ бол еврей нийгэмлэгийн эсрэг хийсэн хулчгар халдлага юм. Би тухайн бүс нутагт эргүүлээ эрчимжүүлж буй цагдаа нартай нягт холбоотой ажиллаж байгаа бөгөөд мэдээлэлтэй хүмүүсийг цагдаад хандахыг уриалж байна. Лондончууд хэзээ ч ийм төрлийн үзэн ядалт, сүрдүүлэгт автахгүй" хэмээн хэлэв.

Тэргүүн раввин Мирвис X (хуучнаар Твиттер) хуудсандаа "Манай 'Хацола' сайн дурын түргэн тусламжийн баг бол еврей болон еврей бус хүмүүсийн амь насыг аврах ганцхан зорилготой онцгой үйлчилгээ юм. Терроризм, үзэн ядалт, амь насыг үл тоомсорлох үзэлд автсан хүмүүс 'Хацола'-г онилж байгаа нь амьдралыг дээдлэгчид болон түүнийг устгахыг санаархагчдын хооронд өрнөж буй тэмцлийн хамгийн эмгэнэлтэй жишээ боллоо" гэж бичжээ.

Марк Гарднер BBC Radio 4-ийн "Today" хөтөлбөрт өгсөн ярилцлагадаа "Шөнө дунд Лондонд түргэн тусламжийн тэрэгнүүдийг дэлбэлж байгаа нь Лондонгийн эсрэг, цаашлаад Их Британийн эсрэг халдлага юм. Үүнийг үргэлж еврейчүүдийн эсрэг хүчирхийлэл гэж ярьдаг. Гэхдээ би Британи хүн, тиймээс энэ нь Британийн эсрэг халдлага бөгөөд үүнийг ингэж хүлээж авах нь чухал" гэжээ.

Даваа гарагийн шөнийн 01:45 цагийн орчимд гал гарсан тухай дуудлагаар цагдаа нар Голдерс Грин дэх Хайфилд Роуд руу очсон байна. Эдгээр түргэн тусламжийн тэрэгнүүд нь 1979 онд байгуулагдсан, сайн дурынхны хүчээр үйл ажиллагаа явуулдаг бөгөөд хойд Лондонд амьдардаг иргэдэд үнэ төлбөргүй эмнэлгийн тээвэрлэлт, яаралтай тусламж үзүүлдэг еврейчүүдийн "Хацола" буяны байгууллагынх байжээ.

Лондонгийн гал түймэртэй тэмцэх албанаас (LFB) галын голомт руу зургаан галын машин, 40 орчим гал сөнөөгчийг илгээсэн бөгөөд галын улмаас дөрвөн тээврийн хэрэгсэл шатсан байна. Автомашинууд дээр байсан хэд хэдэн хүчилтөрөгчийн бортого дэлбэрсний улмаас зэргэлдээх орон сууцны цонхнууд хагарсан гэж тус албанаас мэдээлэв. Одоогоор хүн бэртэж гэмтсэн тухай мэдээлэл гараагүй байна.

Эрүүл мэндийн сайд Уэс Стритинг X хуудсандаа "Энэ бол еврейчүүдийн түргэн тусламжийн тэрэгний эсрэг хийсэн жигшүүрт халдлага юм. Азаар хүн бэртээгүй бололтой. Мэдээлэлтэй хүн байвал цагдаад хандах хэрэгтэй. Бид антисемит үзэн ядалтын эсрэг хамтдаа зогсох ёстой" гэж бичжээ.

Нийслэлийн цагдаагийн газраас уг хэргийг антисемит үзэн ядах гэмт хэрэг хэмээн шалгаж байгааг баталлаа. Тус бүсийн цагдаагийн газрын дарга, ахлах байцаагч Сара Жексон "Энэ хэрэг олон нийтийн дунд ихээхэн түгшүүр төрүүлнэ гэдгийг бид мэдэж байгаа бөгөөд цагдаа нар хэргийн газарт яаралтай мөрдөн байцаалт явуулж байна. Бид хяналтын камерын бичлэгүүдийг шалгаж байгаа бөгөөд цахим орчинд тархсан бичлэгүүдийн талаар ч мэдээлэлтэй байгаа. Одоогоор гурван сэжигтнийг эрэн сурвалжилж байна" гэжээ.

Тэрээр цааш нь "Одоогоор хүн баривчлаагүй байгаа бөгөөд мэдээлэлтэй хүмүүсийг бидэнтэй аль болох хурдан холбоо барихыг уриалж байна. Та хүсвэл нэрээ нууцлах боломжтой. Бид мөрдөн байцаалтын ажиллагааг үргэлжлүүлэхийн зэрэгцээ иргэдийн аюулгүй байдлыг хангах үүднээс шашны удирдагчидтай хамтран ажиллаж, орон нутагт нэмэлт эргүүл гаргах болно" гэж нэмж хэлэв.

Голдерс Грин дүүрэгт хөршийн хяналтын үйл ажиллагаа явуулдаг ашгийн бус "Шомрим" байгууллага даваа гарагийн өглөө эрт "хүчтэй дэлбэрэлтүүд болсныг мэдсэн" гэжээ. Тус бүлэг X хуудсандаа "Хацолагийн түргэн тусламжийн тэрэгнүүдийг санаатайгаар шатаасан хэргийн дараа яаралтай тусламжийн албаныхан хэргийн газарт ажиллаж байна. Дэлбэрэлт нь бөмбөг эсвэл тэсрэх төхөөрөмжөөс бус хүчилтөрөгчийн бортогоноос үүдэлтэй. Зарим барилгыг нүүлгэн шилжүүлсэн ч хүн бэртэж гэмтсэн тухай мэдээлэл алга. Мөрдөн байцаалт үргэлжилж байгаа тул тухайн бүсээс хол байхыг хүсье" гэж бичсэн байна. Мөн Хацолагийн үйл ажиллагаа хэвийн үргэлжилж байгааг онцолжээ.

Хэргийн газарт байсан Голдерс Грин дүүргийн зөвлөлийн гишүүн Дин Коэн "Jewish News" сонинд өгсөн ярилцлагадаа "Энэ хэрэг синагогийн (еврейчүүдийн мөргөлийн сүм) зогсоолд гарсан нь онцгой айдас төрүүлж байна. Их Британид антисемитизмийн талаарх айдас түгшүүр нэмэгдсэн энэ үед манай нийгэмлэгт маш хүнд цохилт боллоо" гэжээ.

"Community Security Trust" байгууллага X хуудсандаа гаргасан мэдэгдэлдээ цагдаагийн мөрдөн байцаалтад тусалж байгаагаа батлав. "Лондонд Хацолагийн хэд хэдэн түргэн тусламжийн тэргийг санаатайгаар шатаасан хэргийн талаар бид мэдэж байгаа. Энэ нь саяхан Бельги, Нидерландад гарсан үүнтэй төстэй антисемит галдан шатаах халдлагуудтай шууд харьцуулагдаж байна. Одоогоор хүн бэртэж гэмтсэн тухай мэдээлэл гараагүй бөгөөд бид Барнет дүүргийн цагдаагийн газарт мөрдөн байцаалтын ажилд нь тусалж байна" гэжээ.