Австралийн өргөн нэвтрүүлгийн корпорацийн (ABC) ажилтнууд удирдлагуудаас тавьсан цалин нэмэх саналыг хүлээн авахаас татгалзсаны дараа лхагва гарагт сүүлийн 20 жилд анх удаа ажил хаялт зарлах гэж байна.

Орон нутгийн цагаар 11:00 цагт эхлэх 24 цагийн ажил хаялт нь телевиз, радиогийн шууд нэвтрүүлгүүдийн үйл ажиллагааг тасалдуулах төлөвтэй байна.

Энэхүү үйл явдал нь ABC-ийн нийт ажилтнуудын 60 хувь нь гурван жилийн хугацаанд цалинг нийт 10 хувиар (эхний жилд 3.5 хувь, дараагийн хоёр жилд тус бүр 3.25 хувь) нэмэгдүүлэх удирдлагынхаа саналыг няцаасны дараа болж байгаа юм. Австрали улсад өнгөрсөн нэгдүгээр сард жилийн инфляцын түвшин 3.8 хувьтай гарсан байна.

Үйлдвэрчний эвлэлүүдийн зүгээс уг саналыг хэтэрхий бага байна гэж үзсэн бөгөөд нөхөн үржихүйн эрүүл мэндийн чөлөө болон хиймэл оюун ухааны ашиглалт зэрэг бусад олон асуудлыг шийдвэрлэж чадаагүй гэж мэдэгджээ.

ABC нь 4500 орчим ажилтантай бөгөөд ням гарагт болсон санал хураалтад тэдний 75 хувь нь оролцсон байна.

Сэтгүүлчдийн үйлдвэрчний эвлэл болох Хэвлэл мэдээлэл, цэнгээн, урлагийн холбооны (MEAA) төлөөлөгч Майкл Слезак "Бид ажлын нөхцөлийг дордуулсан, цалингийн өсөлт нь инфляцын түвшнээс хоцрогдсон, мөн ABC-ийн сэтгүүлчдийг хиймэл оюун ухаанаар солихгүй гэх баталгааг өгөхөөс татгалзсан гэрээг хүлээн зөвшөөрөх боломжгүй" гэж хэлэв.

Сэтгүүлч бус ажилтнуудын Нийгэм, төрийн салбарын үйлдвэрчний эвлэлийн (CPSU) төлөөлөгч Жоселин Гамми хэлэхдээ, ABC "шударга санал" тавихгүй л бол үйл ажиллагаа тасалдах нь "зайлшгүй" гэжээ.

"Үйлдвэрчний эвлэлийн гишүүдийн хувьд нэвтрүүлэг, үйлчилгээг тасалдуулж, ABC-ийн үнэнч үзэгчдийг хохироох нь хамгийн сүүлд хийхийг хүсэх зүйл боловч хэлэлцээрийн гол шаардлагууд шийдэгдээгүй хэвээр байна" гэж тэрээр нэмж хэлэв.

Гэвч ABC-ийн гүйцэтгэх захирал Хью Маркс хэлэхдээ, энэхүү санал нь "ABC-ийн тогтвортойгоор олгож чадах дээд хэмжээг тусгасан бөгөөд бидний анхаарах ёстой бүх хүчин зүйлийг харгалзан үзсэн тэнцвэртэй шийдвэр" гэжээ. Мөн тэрээр уг саналыг "тогтвортой бөгөөд санхүүгийн хувьд хариуцлагатай" гэж тодотгосон байна.

ABC уг маргааныг шийдвэрлэхэд тусламж хүсэж Австралийн хөдөлмөрийн маргаан таслах байгууллага болох Шударга хөдөлмөрийн хороонд хандах болно.

ABC-ийн ажилтнууд хамгийн сүүлд 2006 онд цалин болон хөдөлмөр эрхлэлтийн нөхцөлийн асуудлаар ажил хаялт зарлаж байжээ.