АНУ-ын Ерөнхийлөгч Дональд Трампын засаг захиргаа тус улсын түүх, соёлын дүр төрхийг шинэчлэх бодлогынхоо хүрээнд Цагаан ордны талбайд Италийн аялагч Христофор Колумбын хөшөөг байрлуулжээ.

Д.Трамп “Америкийн эсрэг” үзэл суртлын эсрэг явуулж буй энэхүү кампанит ажлынхаа хүрээнд боолчлолтой холбоотой үзмэрүүдийг буулгаж, Холбооны улсын үеийн хөшөө дурсгалуудыг сэргээн босгож байгаа юм. Харин иргэний эрхийн төлөө тэмцэгчид "эдгээр алхам нь нийгмийн олон арван жилийн ололт амжилтыг ухрааж болзошгүй" хэмээн үзэж байна.

“Уг хөшөөг Цагаан ордны цогцолбор дахь Эйзенхауэрын нэрэмжит Гүйцэтгэх засаглалын ажлын байрны хойд талд байршуулсан” гэж Ерөнхийлөгч Д.Трамп Америк дахь итали гаралтай иргэдийн холбоонд ням гарагт илгээсэн захидалдаа дурджээ.

Тэрбээр уг хөшөөг Засгийн газарт бэлэглэсэн тус холбооныхонд талархал илэрхийлсэн байна.

2020 онд өнгөт арьст иргэн Жорж Флойд амиа алдсантай холбоотойгоор өрнөсөн “Black Lives Matter” хөдөлгөөний эсэргүүцлийн жагсаалын үеэр АНУ-ын хэд хэдэн хотод Колумбын хөшөөг буулгасан юм. Италийн далайчин Христофор Колумб 1490-ээд оноос эхлэн Испанийн санхүүжилтээр аялж, европчууд Америк тивийг эзлэн авах эхлэлийг тавьсан гэж үздэг. Жорж Флойдын амь насыг хөнөөсөн хэрэг нь колоничлол, боолчлолын үеээс үлдсэн өвийг дэлхий даяар дахин эргэн харахад хүргэсэн. Арьсны өнгөөр ялгаварлан гадуурхах үзлийн эсрэг тэмцэгчид Х.Колумбыг уугуул иргэдтэй харгис хэрцгий харьцаж байсныг бүдэгрүүлэн харуулах, түүнийг баатар мэтээр дүрслэхийг эсэргүүцэж байв.

Д.Трамп захидалдаа Х.Колумбыг “Америкийн жинхэнэ баатар бөгөөд дэлхийн түүхэн дэх хамгийн эрэлхэг, алсын хараатай хүмүүсийн нэг” хэмээн тодорхойлжээ.

Цагаан ордны талбайд байрлуулсан уг хөшөө нь 1984 онд Ерөнхийлөгч асан Рональд Рейган Балтимор хотод нээж байсан хөшөөний шинэчилсэн хувилбар юм. Уг хөшөөг 2020 онд жагсагчид боомтын усан дотор хаяж байсан бөгөөд Д.Трамп захидалдаа тэднийг “Америкийн эсрэг үймээн самуун дэгдээгчид” гэж нэрлэсэн байна.

Мөн өнгөрсөн долоо хоногт АНУ-ын Дотоод хэргийн яамнаас Тусгаар тогтнолын тунхаг бичигт гарын үсэг зурсан, боол эзэмшигч асан Цезарь Роднигийн хөшөөг Вашингтонд байрлуулахаар шийдвэрлэснээ мэдэгдсэн байна.

Үүнээс гадна 2020 оны жагсаалын үеэр буулгасан Холбооны улсын генерал Альберт Пайкийн хөшөөг өнгөрсөн онд Вашингтонд дахин босгоод байгаа юм.