АНУ-ын улсын өр түүхэнд анх удаагаа 39 их наяд доллароос давсныг тус улсын Сангийн яамнаас өчигдөр танилцуулсан тайлан харуулж байна.

Өрийн хэмжээ 2025 оны 10 дугаар сарын сүүлчээр 38 их наядыг давсан бол наймдугаар сард 37 их наядад хүрчээ.

Урьд хожид үзэгдээгүйгээр өр нэмэгдэж байгаа нь Ерөнхийлөгч Д.Трампын засаг захиргааны үйл ажиллагааны тэргүүлэх чиглэлүүд өөр хоорондоо зөрчилдөж буйг харуулж байгаа юм. Тухайлбал, татварыг бууруулах хууль батлагдсаны сацуу батлан хамгаалах салбар, цагаачлалын албаны зардал нэмэгдсэнийг дурдаж болно.

Улсын өр өснө гэдэг бол америкчуудын авдаг ипотекийн ба автомашины зээлийн хүү өсөж, цалингийн хэмжээ буурч, бараа үйлчилгээний үнэ нэмэгдэнэ гэсэн үг хэмээн АНУ-ын Тооцооны танхим тайлбарласан байна.

Ашгийн бус Peter G. Peterson сангийн тэргүүн Майкл Петерсоны таамаглаж байгаагаар, улсын өр энэ эрчээр өсөх аваас 11 дүгээр сард болох Төлөөлөгчдийн танхимын ба Сенатын завсрын сонгуулиас өмнө 40 их наяд долларт хүрэх ажээ.

Сүүлийн жилүүдэд дэгдсэн дайн, геополитикийн мөргөлдөөнүүд, цар тахал зэргээс үүдэн АНУ-ын улсын өр хурдтай өсөж байна. Тухайлбал, Ираны эсрэг байлдааны ажиллагаанд хэдийн 12 тэрбум доллар зарцуулаад байгааг АНУ-ын Үндэсний эдийн засгийн зөвлөлийн захирал Кевин Хассетт тооцоолон гаргажээ.

Эх сурвалж: DW