Нийгмийн сүлжээний хэт их хэрэглээ нь залуу үе, тэр дундаа англи хэлээр ярьдаг зарим орны охидын сайн сайхан амьдралд сөргөөр нөлөөлж байгаа тухай пүрэв гарагт танилцуулсан "Дэлхийн аз жаргалын тайлан"-д дурджээ.

Өнгөрсөн оны 12 дугаар сард Австрали 16-гаас доош насны хүүхдүүдийг нийгмийн сүлжээ хэрэглэхийг хуулиар хориглосон дэлхийн анхны улс болсны дараа олон улс оронд хүүхдүүдийг нийгмийн сүлжээ ашиглахыг хязгаарлах арга хэмжээ авахаар ажиллаж байна.

Жил бүр танилцуулдаг "Дэлхийн аз жаргалын тайлан"-гийн энэ удаагийн судалгааг АНУ-ын судалгааны байгууллага болох "Gallup"-ын өгөгдөл болон Английн Оксфордын их сургуулийн удирдсан олон улсын багийн хийсэн бусад судалгаанд тулгуурлан гаргажээ.

Судлаачид "Gallup"-ын судалгаа болон Эдийн засгийн хамтын ажиллагаа, хөгжлийн байгууллагын сурлагын амжилтын олон улсын үнэлгээний мэдээлэл, бусад судалгааг нэгтгэн шинжлээд нийгмийн сүлжээг хэт их хэрэглэх нь аз жаргалын түвшнийг бууруулдаг гэсэн дүгнэлтийг хийсэн байна.

"Бид нийгмийн сүлжээнд хүмүүс хоорондын харилцааг эргүүлэн авчрахыг хичээх ёстой гэдгийг энэхүү судалгаа харуулж байна" хэмээн Дэлхийн аз жаргалын тайлангийн редакторуудын нэг, Оксфордын их сургуулийн эдийн засгийн ухааны профессор Ян-Эммануэль де Нев ярилаа.

Алгоритмаар санал болгодог инфлүүнсерүүдийн контентыг тогтмол үзэж, дагах нь хүмүүс хоорондын харилцааг дэмждэг платформоос илүү сөрөг нөлөөтэй гэж тэрбээр тайлбарласан байна.

Судалгааны нэгтгэсэн мэдээллээс үзэхэд, өдөрт таваас дээш цагийг нийгмийн сүлжээнд зарцуулдаг 15 настай охидын амьдралын сэтгэл ханамж нийгмийн сүлжээг харьцангуй бага хэрэглэдэг үе тэнгийнхэнтэй нь харьцангуй доогуур байгааг харуулжээ.

"Gallup"-ын судалгаагаар АНУ, Канад, Австрали, Шинэ Зеланд зэрэг орнуудын 25 хүртэлх насны залуусын амьдралын чанарын үнэлгээ буюу амьдралдаа сэтгэл хангалуун байгаа эсэхийг үнэлдэг үзүүлэлт 0-10 онооны шатлалаар сүүлийн арван жилийн хугацаанд бараг нэг оноогоор огцом буурсан байна. Харин дэлхийн бусад орнын залуусын амьдралын сэтгэл ханамжийн хувийн үнэлгээ дунджаар энэ хугацаанд нэмэгджээ.

Эх сурвалж: Reuters