Жил бүрийн гуравдугаар сарын гурав дахь долоо хоногийн мягмар гарагт дэлхий даяар “Дэлхийн нийгмийн ажилтны өдөр”-ийг тэмдэглэн өнгөрүүлдэг.

Энэ жил энэхүү өдөр нь өнөөдөр тохиож байгаа бөгөөд “Хуваагдсан нийгмийг нэгтгэхэд найдвар, эв нэгдлийг хамтдаа бүтээе” уриан дор тэмдэглэн өнгөрүүлж байна. Нийгмийн ажилтан бол хувь хүн, гэр бүл, хүүхэд, ахмад настан, хөгжлийн бэрхшээлтэй иргэд зэрэг нийгмийн эмзэг бүлгийн хүмүүст тулгарч буй асуудлыг шийвдэрлэхэд дэмжлэг үзүүлж, тэдний эрхийг хамгаалах, нийгмийн үйлчилгээ авах боломжийг бүрдүүлэхийн төлөө ажилладаг мэргэжлийн хүн юм.

Тэд зөвхөн анхан, дунд шатанд нийгмийн хамгааллын үйлчилгээ үзүүлэгч бус, нийгмийн өөрчлөлтийг бүтээгч, иргэдийн дуу хоолойг бодлого, шийдвэр гаргагчдад хүргэгч, нийгмийн эв нэгдэл, шударга ёсны төлөөх манлайлагч юм. Та бүхний өдөр тутмын хичээл зүтгэл нь зөвхөн нэг хүний амьдралд төдийгүй түүний гэр бүл, үр хүүхэд, хамт олон, цаашлаад нийгмийн тогтвортой хөгжилд үнэтэй хувь нэмэр оруулдаг билээ.

Нийгмийн ажилтнууд зөвхөн тусламж үзүүлэхээс гадна зөвлөгөө өгөх, зуучлах, нийгмийн асуудлыг судлах, урьдчилан сэргийлэх ажлыг зохион байгуулж, хүн бүрийн оролцоотой, тэгш боломжтой нийгэмд амьдрахад дэмжлэг үзүүлдэг байна.