Ираны эсрэг явуулж буй цэргийн ажиллагаа нь анх төлөвлөж байсан хугацаанаас өмнө дуусна гэж үзэж байгаагаа АНУ-ын Ерөнхийлөгч Д.Трамп CBS News сувагт ярилцлага өгөхдөө мэдэгджээ.
“Дайн бараг дууссан гэж би бодож байна. Тэдэнд тэнгисийн цэрэг байхгүй, холбоо харилцааны систем нь ажиллагаагүй болсон, агаарын цэргийн хүчин ч үгүй болсон” гэж тэрбээр хэлсэн байна
Персийн булан дахь Ормузын хоолойн талаар асуухад Д.Трамп “одоогоор хөлөг онгоцууд нэвтэрч байгаа ч уг бүсийг хяналтдаа авах талаар бодож байна” гэж хариулжээ. Ормузын хоолой нь дэлхийн газрын тос болон шингэрүүлсэн байгалийн хийн тээврийн тавны нэг орчим нь дамжин өнгөрдөг стратегийн чухал хоолой юм. Дайн эхэлснээс хойш энэхүү чухал тээврийн зам бараг хаагдаад байгаа юм.
АНУ, Израилын цэргүүд хоёрдугаар сарын 28-наас Иранд цохилт өгч эхэлсэн бөгөөд Ираны тал хариуд нь Израилын нутаг руу, мөн АНУ-ын цэргийн бааз байрладаг Персийн булангийн орнууд руу довтлоод байгаа юм.
Шинээр томилогдсон Ираны Дээд удирдагч болох Можтаба Хаменейд хандан ямар нэгэн мэдэгдэл хийх эсэх талаар асуухад Трамп “Түүнд хэлэх зүйл алга” хэмээн хариулжээ. Тэрбээр мөн “Ираныг удирдах дараагийн хүн санаанд нь байгаа” гэж хэлсэн боловч өөр дэлгэрэнгүй мэдээлэл өгөөгүй байна.
