Даваа гаргийн арилжаа эхлэхэд Японы Nikkei 225, Өмнөд Солонгосын Kospi индекс тус бүр 6 гаруй хувиар буурснаар Ази, Номхон далайн бүс зах зээлд огцом уналт боллоо. Үүнд газрын тосны үнэ 2022 оноос хойш анх удаа баррель тутамдаа 100 ам.доллароос давсан нь нөлөөлсөн байна.

Японы Nikkei 225 индекс 6.05 хувиар буурч, хоёрдугаар сарын 6-наас хойш анх удаа 53 000 нэгжийн босгоос доошиллоо. Харин Topix индекс 5.27 хувиар унав.

Японы "SoftBank Group" корпорацын хувьцааны ханш 10 хувиар буурч, Nikkei 225 индексийн хувьцаа нь хамгийн их хувиар унасан компаниудын нэг боллоо. Мөн бичил чип үйлдвэрлэгч "Advantest", "Lasertec" компаниудын хувьцаа 10 ба 9 орчим хувиар тус тус унажээ.

Өмнөд Солонгосын Kospi индекс 6.5 хувиар унасны дараа Kospi 200 фьючерсийн арилжааг түр хугацаанд зогсоожээ. Өнгөрсөн долоо хоногийн лхагва гарагт тус индекс 12 гаруй хувиар унаж, нэг өдөр хамгийн их хувиар унасны дараа “circuit breaker” буюу арилжааг түр хугацаанд зогсоох арга хэмжээ авсан юм.

Технологийн салбарын тэргүүлэгч компаниудын нэг болох "Samsung Electronics"-ийн хувьцаа 8.4 хувиар, "SK Hynix" компанийн хувьцааны ханш 9.2 хувиар тус тус унасан байна.

Австралийн "S&P/ASX 200" индекс арилжаа эхлэхэд 3.68 хувиар буурлаа.

Газрын тосны зах зээлд Brent маркийн газрын тосны фьючерс үнэ 16.1 хувиар огцом өсөж, баррель нь 107.61 ам.долларт хүрчээ. Харин АНУ-ын West Texas Intermediate (WTI) маркийн газрын тосны фьючерс үнэ 17.7 хувиар өсөж, баррель нь 107.02 ам.доллар болж нэмэгдсэн байна.

Ойрх Дорнодын томоохон нефть олборлогч орнууд болох Кувейт, Иран болон Нэгдсэн Арабын Эмирт Улс Ормузын хоолой хаагдсаны дараа газрын тосны олборлолтоо бууруулсан нь үнэ өсөхөд нөлөөлжээ.

Харин АНУ-ын Ерөнхийлөгч Дональд Трамп өөрийн Truth Social цахим хуудсаар дамжуулан мэдэгдэхдээ “газрын тосны үнэ түр зуур өссөн нь Иранаас учирч буй цөмийн аюулыг устгасны төлөө төлөх маш бага үнэ. Үүнийг тэнэгүүд л өөрөөр ойлгоно” гэсэн байна.

Хонконгийн Hang Seng индексийн фьючерс ханш 25.328 нэгжид хүрч, өмнөх өдрийн арилжаа хаагдах үеийн 25.757.29 нэгжээс доошиллоо.

Мөн газрын тосны үнийн өсөлтийн нөлөөгөөр АНУ-ын хөрөнгийн зах зээлийн индексүүд буурчээ. "Dow Jones Industrial Average" индек 800 гаруй нэгж буюу 1.75 хувиар унасан бол "S&P 500" индекс 1.59 хувиар, "Nasdaq-100" индекс 1.6 хувиар тус тус буурсан байна.

Эх сурвалж: CNBC