Ираны эсрэг явуулж буй ажиллагаанд цэргийн баазуудаа ашиглуулахаас татгалзсан Испани улстай худалдаа хийхээ зогсооно гэж АНУ-ын Ерөнхийлөгч Д.Трамп сүрдүүлжээ.
Германы Канцлер Фридрих Мерцтэй уулзах үеэрээ Д.Трамп "Испани их муухай зан гаргасан" хэмээн хэлээд, Сангийн сайд Скотт Бессентэд тус улстай хийж буй худалдааны харилцаагаа бүрмөсөн таслах үүрэг өгсөн гэдгээ дурджээ.
"Бид Испанитай хийх худалдаагаа бүхэлд нь зогсооно. Тус улстай ямар нэг харилцаа холбоотой байхыг хүсэхгүй" гэж Д.Трамп хэлсэн байна.
Испанийн социалистуудын засгийн газар тус улсын өмнөд хэсэгт байрлах Рота, Морон баазуудаа Иранд цохилт өгөхөд ашиглуулахаас татгалзсаны дараа АНУ-ын эрх баригчид эдгээр баазад байрлаж байсан 15 нисэх онгоцоо шилжүүлэн байрлуулжээ.
Д.Трамп мөн НАТО-гийн гишүүн орнууд ДНБ-ийхээ 5 хувийг батлан хамгаалах салбартаа зарцуулах ёстой гэсэн шаардлагыг нь Испани биелүүлэхгүй байгааг дахин дурдсан байна.
Эх сурвалж: Reuters
