Канад улсын Британийн Колумб мужийн Дээд шүүхээс хөл бөмбөгийн “Ванкувер Уайткэпс" баг болон Хойд Америкийн хөл бөмбөгийн тэргүүн лигт /MLS/ ногдуулсан 347 мянган долларын торгуулийг хэвээр үлдээх шийдвэр гаргажээ.
2024 онд болсон Хойд Америкийн аварга шалгаруулах тэмцээний нэгэн тоглолтод "Интер Майами" багийн довтлогч Лионел Месси ирж оролцоогүй гэсэн шалтгаанаар нэгэн иргэнээс шүүхэд нэхэмжлэл гаргасныг дахин хянан хэлэлцсэний эцэст дээрх шийдвэрийг гаргасан тухай The Athletic сонинд мэдээлсэн байна.
Тодруулбал, Л.Месси, Луис Суарес, Серхио Бускетс нар 2024 оны тавдугаар сарын 25-нд болсон уг тоглолтод оролцоогүй ажээ. Гэтэл тоглолтын зар сурталчилгааны материалуудад “Барселона”-д тоглож байсан дээрх хөлбөмбөгчдийн нэрс, дүр төрхийг өргөнөөр ашигласнаар “Ванкувер” баг тасалбарынхаа үнийг огцом өсгөсөн байна. Харин тоглолт болохоос хоёр хоногийн өмнө Месси, Суарес, Бускетс нар ирэх боломжгүй болсныг тус клуб мэдэгдээд, цэнгэлдэх хүрээлэнд зарж байсан хоол зуушны үнийг хямдруулах, дараагийн тоглолтуудыг үзэх үнэгүй тасалбарыг нөхөн төлбөр маягаар санал болгожээ.
Хэсэг хугацааны дараа Британийн Колумб мужийн нэгэн оршин суугч шүүхэд гаргасан иргэний нэхэмжлэлдээ “Мессиг сурталчилсан тул би 404 доллароор хоёр ширхэг тасалбар худалдан авсан, энэ нь “Ванкувер”-ын талбайдаа хийдэг бусад тоглолтын тасалбараас 10 дахин илүү үнэтэй байсан” гэж дурдсан байна.
Харин МLS лиг ба “Ванкувер Уайткэпс” баг эхэндээ уг гомдлыг үндэслэлгүй гэж мэдэгдсэн боловч дараа нь асуудлыг эв зүйгээр зохицуулахыг санал болгожээ. Одоо 347 мянган долларын торгуулийг буяны байгууллагуудад хандивлах гэнэ.
Эх сурвалж: РИА Новости
