Францын Ерөнхийлөгч Эммануэл Макрон Ойрх Дорнодод мөргөлдөөн үргэлжилж буйтай холбогдуулан тус улсын цорын ганц нисэх онгоц тээгч “Шарль де Голль” хөлөг онгоцыг Газрын Дундад тэнгист байрлуулах тушаал өгсөн гэдгээ мягмар гарагт мэдэгджээ.
Үндэсний телевизээр олон нийтэд хандан үг хэлэхдээ Францын Ерөнхийлөгч тус бүс нутаг дахь цэргийн оролцоогоо бэхжүүлэх шийдвэр гаргаж, нисэх онгоц тээгч хөлөг онгоц, сөнөөгч онгоцууд, агаарын довтолгооноос хамгаалах системүүдээ илгээж байгаагаа мэдэгдсэн байна.
Э.Макрон хэлэхдээ, Францын “нэр хүнд” эрсдэлд орсон хэмээн онцолж, тус улс нь Катар, АНЭУ зэрэг холбоотнуудтайгаа байгуулсан батлан хамгаалах салбарын гэрээ, хэлэлцээрүүдээ хэрэгжүүлэх шаардлагатай гэлээ.
Тэрбээр даваа гарагт Францын баруун хойд хэсэгт орших Бретань муж дахь Л’Иль-Лонг шумбагч онгоцны баазад Европын аюулгүй байдал, цөмийн тогтоон барих бодлогын асуудлаар чухал үг хэлсэн байна.
Э.Макроны хэлснээр, тэрбээр Францын цөмийн зэвсгийн нөөц дэх цөмийн цэнэгт хошууны тоог нэмэгдүүлэх тушаал өгчээ. Тэрбээр Франц улс өөрийн амин чухал ашиг сонирхлыг хамгаална, ноцтой аюул занал үүсвэл эргэлзэхгүйгээр арга хэмжээ авна гэдгийг онцлоод, цаашид Францын цөмийн цэнэгт хошууны тоог ил тод зарлахгүй гэж мэдэгдсэн байна.
Эх сурвалж: Kazinform
