АНУ-ын Ерөнхийлөгч асан Билл Клинтон Жеффри Эпштейний хэргийг мөрдөн шалгах хүрээнд явуулсан Конгрессын Төлөөлөгчдийн танхимын Хяналтын хорооны хаалттай сонсголын үеэр Конгрессын гишүүдийн бүх асуултад хариулсан байна. Энэ тухай тус хорооны дарга, Кентукки муж улсаас сонгогдсон Бүгд найрамдах намын гишүүн Жеймс Комер мэдэгджээ.

“Энэ бол маш үр дүнтэй мэдүүлэг өгсөн явдал байлаа. Ерөнхийлөгч асан Билл Клинтон бүх асуултад хариулсан, бүгдэд нь хариулахыг оролдсон гэдгийг хэлэх ёстой” гэж тэрбээр сэтгүүлчдэд мэдэгджээ.

АНУ-ын Конгрессын Төлөөлөгчдийн танхимын гишүүн, Өмнөд Каролина муж улсаас сонгогдсон Бүгд найрамдах намын гишүүн Нэнси Мейс мөн хэлэхдээ, Клинтон “асуулт бүрд үнэхээр хариулахыг хичээж байсан, түүгээр барахгүй өмгөөлөгчид нь дуугүй байхыг зөвлөж байсан хэдий ч үргэлжлүүлэн ярьсаар байсан” гэсэн байна.

Өмнө нь Билл Клинтон насанд хүрээгүй хүүхдүүдийг хүчирхийлсэн хэргээр шийтгэгдсэн Жеффри Эпштейний гэмт хэрэгт өөрийг нь холбоотой гэх мэдэгдлийг эрс няцаасан юм. Тэрбээр санхүүчтэй түүний гэмт үйл ажиллагаа ил болохоос нэлээд өмнө холбоогоо тасалсан гэж мэдэгджээ.

Гэргий Хиллари Клинтоныг нь мөн тус хороонд дуудах нь шударга бус гэж үзэж байгаагаа тэрбээр мэдэгдээд, Хиллари Эпштейний эзэмшлийн объектуудад хэзээ ч очиж байгаагүй гэдгийг онцолсон байна.

Б.Клинтон, Ж.Эпштейн нарын харилцаа нягт байсныг баримт бичгүүд харуулж байна гэж CNN телевизээр өмнө нь мэдээлж байв. CNN-ийн тоймд дурдсанаар, Б.Клинтон Эпштейний хувийн онгоцоор дор хаяж 16 удаа ниссэн байна. Мөн АНУ-ын Хууль зүйн яамнаас нийтэлсэн хэргийн материалд Клинтон эмэгтэйчүүдийн хамт жакузид сууж байгаа гэрэл зургууд, түүнчлэн Эпштейн болон түүний хамсаатан Гислейн Максвеллтай хамт авахуулсан зургууд байжээ.

Эх сурвалж: TASS