Өнгөрсөн онд Өмнөд Солонгост шинээр мэндэлсэн хүүхдийн тоо сүүлийн 15 жилийн хамгийн хурдацтай өсөж, нийт төрөлтийн коэффициент буюу нэг эмэгтэй нөхөн үржихүйн насандаа төрүүлэх дундаж хүүхдийн тоо сүүлийн дөрвөн жилд анх удаа 0.8-д хүрсэн болохыг тус улсын Засгийн газрын нийтэлсэн статистик мэдээлэл харуулжээ.
Статистикийн яамнаас танилцуулсан урьдчилсан мэдээгээр, өнгөрсөн онд нийт 254 500 хүүхэд мэндэлсэн нь 2024 оныхоос 6.8 хувиар буюу 16 100-гаар өсжээ. Тус яам эцсийн статистик мэдээг энэ оны наймдугаар сард албан ёсоор танилцуулах аж.
Өнгөрсөн оны энэхүү үзүүлэлт нь 2010 оноос хойших жилийн хамгийн өндөр үзүүлэлт төдийгүй хоёр дахь жилдээ дараалан өссөн үзүүлэлт болжээ.
Нэг эмэгтэйн нөхөн үржихүйн насандаа төрүүлэх хүүхдийн дундаж тоог илтгэдэг нийт төрөлтийн коэффициент 0.8 болсон нь өмнөх оныхоос 0.05-аар нэмэгдсэнээр дөрвөн жилийн хугацаанд анх удаа энэхүү босгод дахин хүрчээ. Шинээр төрсөн хүүхдийн тоо ийнхүү дахин нэмэгдэх болсон нь гэрлэлт нэмэгдсэн болон 2021 оноос хойш хүүхэд төрүүлэх хамгийн тохиромжтой насанд тооцогддог 30 гаруй насны эмэгтэйчүүдийн тоо тасралтгүй өсөж байгаатай холбоотой байна.
Статистик мэдээллээс үзэхэд өнгөрсөн онд Өмнөд Солонгост нас баралт 2024 оныхоос 1.3 хувиар нэмэгдэж 363 400-д хүрч, хүн ам 110 000-аар буурчээ.
