Хоёрдугаар сарын 22-ны үдэш "Милан-Кортина-2026" өвлийн XXV дугаар Олимпын наадмын хаалтын ажиллагаа ёслол төгөлдөр боллоо. Хүн төрөлхтний эв нэгдлийн баяр болсон тус наадмын хаалтын ёслолын гол үйл явдлуудыг гэрэл зургаар тоймлон хүргэж байна.
Энэ удаагийн Олимпод Норвегийн баг тамирчид бусдаас хол тасархай түрүүлж, медалийн чансааг тэргүүллээ. Тэд 18 алт, 12 мөнгө, 11 хүрэл, нийт 41 медальтайгаар Олимпын дэвжээг эзэгнэв.
Удаах байруудад АНУ-ын шигшээ 12 алт ба мөнгө, 9 хүрэл медальтайгаар шалгарав. Топ-3-ыг 10 алт, 7 мөнгө, 3 хүрэлтэй Нидерланд мөн зохион байгуулагч улс Итали 10 алт, 6 мөнгө, 14 хүрэл хүрэл медаль тус тус хүртжээ.
Өвлийн Олимпын наадмын турш нийт 116 багц медалийн төлөө тамирчид хурд хүчээ сорьсон байна.
Хаалтын ёслол Верона хотын алдарт Arena di Verona амфитеатрт болсон нь онцлог байв. Манай эриний I зуунд баригдсан энэхүү түүхэн байгууламжид болсон ёслолын тасалбар 950 еврогоор үнэлэгджээ. Өмнө нь бид энэ олимпийн тоглолтын медалиуд хамгийн өндөр үнэтэй байсныг өгүүлсэн билээ.
Ёслолын эхэнд үзэгчдийн өмнө дуурийн баатрууд гарч ирэн, Ж.Вердийн алдарт "Травиата" дуурийн аялгуугаар арга хэмжээг нээлээ.
Ёслолын албан ёсны хэсэгт Олимпын бамбарыг унтрааж, далбааг буулган дараагийн наадмыг зохион байгуулах Франц улсад шилжүүлэн өгөв. Ирэх 2030 оны өвлийн Олимп Францын Альпийн нуруунд зохион байгуулагдах юм.
Олимпын бамбарыг тайзнаа Лиллехаммер-1994 наадмын аваргууд болох Маурилио Де Зольт, Марко Альбарелло, Сильвио Фаунер нар хүндэтгэлтэйгээр авчирлаа. 
Хаалтын ёслолын үеэр цанын 50 км-ийн марафон төрлийн медалийг гардуулсан бөгөөд эрэгтэйчүүдийн төрөлд Норвегийн тамирчид шагналын тавцанг бүрэн эзэлсэн юм.
Норвегийн цаначин Йоханнес Клебо нь энэ наадмаас зургаа дахь алтан медалиа хүртсэнээр Олимпын 11 удаагийн аварга болж түүхэн амжилт гаргалаа . Ингэснээр тэрээр өмнө нь 8 алтан медальтайгаар түүхэнд бичигдэж байсан Марита Бьерген, Бьорн Дэли, Уле-Эйнар Бьорндален нарын амжилтыг эвдэж, өвлийн Олимпын хамгийн олон алтан медальтай тамирчин болов.
Хаалтын ажиллагаанд Италийн орчин үеийн болон сонгодог урлагийн одод оролцлоо. Веронагийн репчин Акилле Лауро, нэрт DJ Габри Понте болон Arena di Verona сангийн найрал дуучид ая дуугаа өргөв. Тамирчид тайзнаа Италийн киноны алдарт дуунуудыг шинэчлэн найруулсан "Calibro 35" хамтлагийн хөгжмийн хэмнэл дор жагслаа.
Эцэст нь, Франц болон Итали улсууд сүүлийн жилүүдийн Олимпын нээлт, хаалтын ажиллагаагаараа өөрсдийгөө соёл, урлагийн дэлхийн тэргүүлэгч гүрэн гэдгээ дахин нэгэнтээ батлан харуулж чадлаа.
Эх сурвалж: Office life
