АНУ-ын эрх баригчид Сирийн зүүн хойд бүс нутаг дахь хамгийн том баазаасаа цэргээ татаж эхэлжээ. Ингэснээр Дамаск дахь засгийн газар тус бүс нутагт хяналтаа тогтоож буйтай холбоотойгоор АНУ-ын цэргүүдийг Сириэс бүрэн гаргах үйл явцыг эхлүүлжээ.
Хуягт техникүүд ачсан олон арван ачааны машин өчигдөр буюу даваа гаргийн өглөө Хасака мужийн Касрак дахь баазаас хөдөлж, уг цуваа Камышлы хотын захын хурдны замаар явж байсан нь Reuters агентлагийн бичлэг дээр харагдсан байна.
АНУ тэргүүтэй олон улсын эвслийн цэргүүд Касрак баазаас бүрэн гарах боловч Иракийн хилийн ойролцоо орших Рмелан (Хараб аль-Жир гэж нэрлэдэг) дахь цэргийн баазад үлдэх аж.
Касрак нь Сири дэх "Исламын улс" бүлэглэлтэй тэмцэж буй АНУ тэргүүтэй олон улсын эвслийн гол бааз байсан юм. Мөн АНУ-ын цэргүүд арав гаруй жилийн өмнө курдүүдээр удирдуулсан Сирийн Ардчилсан хүчинтэй хамтран жихадист бүлэглэлүүдийн эсрэг ажиллагаа явуулахаар тус баазад байрлаж байжээ.
АНУ-ын Батлан хамгаалах яамны албаны хүн тайлбар хийх хүсэлтэд "Бид цэргийн ажиллагааны аюулгүй байдлыг хангах үүднээс цэргийн байршил, бие бүрэлдэхүүний тоо хэмжээний талаар мэдээлэл өгөх боломжгүй" гэж мэдэгдсэн байна.
Одоогоор Сирийн Батлан хамгаалах яам болон Сирийн Ардчилсан хүчний зүгээс албан ёсны тайлбар өгөөгүй байна.
Эх сурвалж: Reuters
