Нидерландын түүхэн дэх хамгийн залуу Ерөнхий сайд Роб Йеттен тангаргаа өргөж, албан ёсоор үүрэгт ажилдаа оржээ.
Тус улсын өмнөх Ерөнхий сайд Дик Шуфын засгийн газар 2025 оны зун унасны дараа явуулсан ээлжит бус сонгуульд өдгөө 38 настай Р.Йеттений нам Герт Вилдерсоны удирддаг хэт барууны үзэл баримтлалтай Эрх чөлөөний төлөөх намыг (PVV) багахан саналын зөрүүтэй ялсан байна. Одоо Р.Йеттен өөрийн “Демократ-66” (D66) нам, баруун төвийн үзэлт "Христийн ардчилсан дуудлага" (CDA), Эрх чөлөө ба ардчиллын төлөөх либерал ардын нам (VVD) гэсэн гурван намын хамтарсан засгийн газрыг удирдана. Эдгээр гурван нам нь нийлээд парламентын 150 суудлын 66-г эзэлж байгаа тул шинэ Ерөнхий сайд эхний өдрөөсөө л шийдвэр гаргахдаа сөрөг хүчнүүдийн дэмжлэгт найдах шаардлагатай болж байна.
Р.Йеттений засгийн газар батлан хамгаалах зардлыг дотоодын нийт бүтээгдэхүүний 5 хувьд хүргэх НАТО-гийн зорилтыг биелүүлэхийн тулд зэвсэгт хүчинд дахин олон тэрбум еврогийн хөрөнгө оруулж, батлан хамгаалах салбарт их хэмжээний хөрөнгө зарцуулахаар төлөвлөж байна. Шинэ Ерөнхий сайдын баг мөн Нидерландын мал аж ахуйн салбараас ялгарах хүлэмжийн хийн ялгарлын хэмжээг бууруулах төлөвлөгөөг үргэлжлүүлэн хэрэгжүүлнэ гэдгээ мэдэгджээ.
Франц, Германд хэт барууны үзэлт намууд олон нийтийн санал асуулгуудаар тэргүүлж байгаа тул Р.Йеттен өнгөрсөн оны аравдугаар сард ялж, ерөнхий сайд болсон нь Европын Холбооны хувьд нааштай үйл явдал болжээ. Учир нь тэрбээр Европын Холбоог тэлэх бодлогыг баримтална гэдгээ мэдэгдсэн байна.
Эх сурвалж: Kazinform
