2026 оны Италийн өвлийн олимп зохион байгуулагчид байгалийн цасны хомсдолоос үүдэн хиймэл цас, усны нөөц бүрдүүлэхэд хэдэн арван сая евро зарцуулаад байна. Кортина-д’Ампеццо бүс нутагт агаарын дундаж температур 1956 оноос хойш 3.6°C-аар нэмэгдсэн нь өвлийн спортын дэд бүтцийг асар их зардалтай "аж үйлдвэрийн цех" болгон хувиргалаа. Энэ жил зохион байгуулагчид 1.6 сая шоо метр техникийн цас бэлтгэсэн бөгөөд эрчим хүчний үнэ өссөнөөс нэг шоо метр цасны өртөг 7 евро хүрчээ.
Хиймэл цас нь зөвхөн санхүүгийн асуудал бус, тамирчдын эрүүл мэнд, байгаль орчинд сөрөг нөлөөтэйг эрдэмтэд анхааруулж байна. Техникийн цас нь маш нягт, хатуу бүтэцтэй тул унах үед асфальт дээр унасан мэт хүнд гэмтэл авах эрсдэлийг нэмэгдүүлдэг төдийгүй хавар удаан хайлж, хөрсний усны эргэлт, ургамал ургахад даралт болдог байна. Судалгаагаар 2050 он гэхэд дэлхий дээр хиймэл цас ашиглахгүйгээр өвлийн олимп хүлээн авах боломжтой ердөө дөрвөн газар л үлдэх төлөвтэй байна.
Нөгөө талаас Олон улсын олимпийн хороо (ОУОХ) санхүүгийн гүн хямралд оржээ. Томоохон түнш болох Toyota, Bridgestone зэрэг компаниуд ОУОХ-ны үйл ажиллагаанд итгэл алдарч, гэрээгээ цуцалснаар ивээн тэтгэлгийн ашиг 64%-иар унасан байна. Үүнийг нөхөхийн тулд байгаль орчинд халтай нефть, агаарын тээврийн компаниудтай хамтрах болсон нь тамирчдын зүгээс хүчтэй эсэргүүцэлтэй тулгарч эхэллээ. Мэргэжлийн 21 мянган тамирчин нэгдэж, уур амьсгалыг бохирдуулагч корпорациудын сурталчилгааг олимпийн наадамд гаргахгүй байхыг шаардсан өргөх бичгийг ОУОХ-нд бариад байна.
