Хичээлийн шинэ улирал эхэлж буй эхний өдөр Иранд оюутнуудын эсэргүүцлийн ажиллагаа дахин дэгдсэн байна.

Амиркабирын Технологийн их сургууль, Шарифын Технологийн их сургуулийн оюутнууд сургуулийнхаа оюутны хотхонд цугларч, Ираны дээд удирдагч Али Хаменеиг эсэргүүцсэн уриа хашгирч байв. Мөн Шарифын их сургуулийн орчинд Хаменеигийн дэглэмийг эсэргүүцэгчид ба дэмжигчдийн хооронд мөргөлдөөн болжээ.  Эсэргүүцэгчид “Шах мандтугай” гэсэн уриа хашгирч байв. Шах гэдэг нь 1979 оны Исламын хувьсгалаар түлхэгдэн унасан сүүлчийн шахын хүү Реза Пехлеви юм.  

Түүнчлэн Тегераны их сургууль, Шахид Бехешти-гийн нэрэмжит их сургуульд эсэргүүцлийн ажиллагаа болж, түүнд оролцогчид нэгдүгээр сарын жагсаал цуглааны үеэр баривчлагдсан оюутнуудыг суллахыг шаарджээ.  

17-ны өдөр Ираны хэд хэдэн хотод нэгдүгээр сарын эсэргүүцлийн ажиллагааны үеэр амиа алдсан хүмүүсийг дурсгалыг хүндэтгэх ёслол болжээ. Түүнд оролцогчид “Хаменеид үхэл”, “Шах мандтугай” гэсэн лоозон барьсан байсан бөгөөд тэдний болон аюулаас хамгаалах хүчнийхний хооронд мөргөлдөөн болсон байна.  

Мөн өдөр Тегеран дахь Имам Хомейни-гийн сүмд амиа алдсан хүмүүсийн дурсгалыг хүндэтгэх ёслолыг Ираны эрх баригчид зохион байгуулжээ. Ёслолд оролцогчид “Америкт үхэл”, “Израилд үхэл” гэсэн лоозонгууд барьсан байв. Ираны дэд ерөнхийлөгч Мохаммад Реза Ареф, Исламын хувьсгалыг хамгаалагчдын корпусын командлагч Эсмаил Каани уг ёслолд оролцож үг хэлжээ.

Өнгөрсөн оны 12 дугаар сард дэгдэж, энэ оны нэгдүгээр сарын дамнан үргэлжилсэн эсэргүүцлийн ажиллагааны явцад 3117 хүн амиа алдсан гэж Ираны Гадаад хэргийн сайд Аббас Арагчи мэдэгдсэн бол АНУ-д байрладаг хүний эрхийг хамгаалах Human Rights Activists News Agency (HRANA) агентлагийн мэдээлснээр, амиа алдсан хүмүүсийн тоо 7 мянгаас давсан байна.