Дөрвөн сансрын нисгэгчээс бүрдсэн “Орион” сансрын хөлгийн багийг Сар луу илгээх ажиллагааг тодорхойгүй хугацаагаар хойшлуулсан тухай НАСА агентлаг мэдээлжээ.
Мэдээлэлд дурдсанаар, зөөгч пуужинд техникийн доголдол гарсныг инженерүүд илрүүлсэн байна. Сансрын хөлгийг 3 дугаар сард хөөргөхөөр төлөвлөж байсан боловч Space Launch System пуужингийн хөдөлгүүрийн криогений хэсэг дэх гели дамжуулах сувагт гэмтэл гарчээ. Түлшний савны даралтыг алдагдуулахгүй байх, пуужингийн системийг хөргөхөд гелийг ашигладаг тул нэмэлт засвар үйлчилгээ хийх зайлшгүй шаардлагатай болжээ.
НАСА-гийн захирал Жаред Айзекманы хэлснээр, техникийн доголдлыг арилгахын тулд зөөгч пуужинг угсрах цехэд буцаан аваачих ажээ. Тэрбээр “Орион” хөлгийг хэзээ Сар луу хөөргөх талаар дурдсангүй.
“Орион”-ыг хөөргөснөөр АНУ-ын сарны шинэ хөтөлбөрийн түүхэн дэх хоёр дахь үе шат эхлэх ёстой. Ингэснээр дөрвөн сансрын нисгэгчээс бүрдсэн баг 10 хоногийн хугацаанд Сарыг тойрон нисээд эх Дэлхийдээ буцаж ирэх юм.
Сар луу нисэх “Артемида” хөтөлбөрийг боловсруулснаа НАСА 2019 онд зарласан байна. Хөтөлбөрийн зорилго нь Сар луу байнга нисэх боломжийг нээх, цаашдаа Ангараг гараг руу нислэг үйлдэхэд зориулсан дамжин өнгөрөх баазыг Саран дээр байгуулах явдал юм.
2022 оны 12 дугаар сард уг хөтөлбөрийн эхний үе шат болох “Артемида-1”-ийн хүрээнд “Орион” сансрын хөлөг Сарны тойрог замд хэдэн долоо хоногийн турш ниссэний дараа Дэлхийд буцаж иржээ. “Артемида-2” үе шатанд сансрын нисгэгчид Сарны тойрог замд нислэг үйлдэх бол "Артемида-3" үе шатанд сүүлийн 50 гаруй жилийн хугацаанд анх удаагаа сансрын нисгэгчид Сарны гадаргуу дээр буух юм.
