Энэ оны гуравдугаар сарын 15-нд дуусах ёстой байсан Германы хуурай замын хил дээрх түр хяналт шалгалтыг дахин 6 сараар сунгажээ. “Аюулгүй байдал, цагаачлалын бодлогын үүднээс ийм хяналт шалгалт хийх шаардлагатай хэвээр байна” гэж Германы Дотоод хэргийн сайд Александр Добриндт өчигдөр мэдэгдлээ.

Эл шийдвэрийн талаарх албан мэдээллийг Брюссель дэх Европын Комисст илгээсэн байна. Харин сөрөг хүчний “90-ийн холбоо /ногоонтнууд” намынхан уг шийдвэрийг шүүмжлэхдээ "Добриндт хилийг байнга хаалттай байлгаснаар Европын үзэл санааг сүйрүүлж байна” гэжээ. Ийм хяналт шалгалт нь хил орчмын иргэд чөлөөтэй зорчиход саад болж байгаагаас гадна галт тэрэгний буудал зэрэг улс орны дотоод дахь объектуудад дэг журмыг хангах ажлаас цагдаагийн албан хаагчдыг хөндийрүүлж байна гэж ногоонтнуудын дотоод бодлогын шинжээч Марсель Эммерих үзэж байна.  

Германы хуурай замын хил дээр хяналт тогтоох тухай шийдвэрийг 2024 оны 9 дүгээр сард тухайн үеийн Дотоод хэргийн сайд Нэнси Фезер гаргажээ. Ингэхдээ Европын Холбооны дотоод хил дээр хилийн хяналт тогтооно гэсэн хуулийн заалт байдаггүй учраас дээрх шийдвэрийг “түр зуурын” гэж зарласан байна.

Фезерийн дараа Дотоод хэргийн сайдаар томилогдсон Добриндт цагаачлалын бодлогыг чангатгаж байгаагаа мэдэгдээд, орогнол хүссэн гадаадын иргэдэд татгалзсан хариуг Германы хил дээрээс шууд өгөх болжээ. Хил дээр хяналт шалгалт хийх болсноор Германы төсвөөс 80,5 сая еврогийн зардал гараад байгаа бөгөөд үүнээс 37,9 сая еврог цагдаагийн ажилтнуудад илүү цагийн хөлс болгон олгосон байна. 

Харин Германы Канцлер Ф.Мерц өнгөрсөн оны сүүлчээр мэдэгдэхдээ “улс төрийн орогнол олгох шалгууруудыг чангатгах талаар Европын Холбооны орнууд зөвшилцөлд хүрсэн учраас гишүүн орнуудын хил дээрх хяналт шалгалтыг зогсооно” гэж байсан юм.