Бямба гарагт Олон улсын сансрын станцад /ОУСС/ АНУ, ОХУ, Францын сансрын нисгэгчдээс бүрдсэн шинэ баг хүрэлцэн иржээ.

НАСА-гийн сансрын нисгэгчид болох Жессика Меир, Жек Хэтэуэй, Францын сансрын нисгэгч Софи Адено, Оросын сансрын нисгэгч Андрей Федяев нарын суусан Crew-12 сансрын хөлгийг баасан гарагт Флорида дахь Кеннедигийн нэрэмжит сансрын буудлаас Falcon 9 зөөгч пуужингаар хөөргөсөн бөгөөд дөрвөн сансрын нисгэгч 34 цагийн турш ниссэний эцэст ОУСС-д ирсэн байна.

Өмнөх багийнхныг эрүүл мэндийн шалтгаанаар яаралтай буцааснаас хойш яг нэг сарын дараа сансрын шинэ баг ирснээр станцын бие бүрэлдэхүүн бүрэн бүрдлээ. Crew-11 багийнхныг дэлхий рүү буцаасан нь ОУСС-ын түүхэн дэх анхны тохиолдол бөгөөд багийн гишүүдээс хэн нь өвчилснийг НАСА зарлахгүй байгаа юм.

Багийнхан буцсанаас хойш 400 км-ийн өндөрт ажилладаг тус станцын үйл ажиллагааг Америкийн сансрын нисгэгч Крис Уильямс, Оросын сансрын нисгэгч Сергей Кудь-Сверчков, Сергей Микаев нар хариуцаж үлдсэн юм.

“Станцын цонхоор эх Дэлхийгээ харж байх үед хамтран ажиллах боломжтой төдийгүй чухал хэрэгтэй гэж бодогдлоо” хэмээн Америкийн сансрын нисгэгч Меир Crew-12 хөлөг станцтай залгагдсаны дараа хэлсэн бол эх Дэлхийнхээ гоо үзэсгэлэнг ямар нэгэн хязгаарлагч шугамгүйгээр харах нь тун хөгжилтэй бөгөөд сонирхолтой байлаа гэж франц эмэгтэй Адено өгүүлэв. Тэрбээр сансарт ниссэн Францын хоёр дахь эмэгтэй бөгөөд өмнө нь 1996 ба 2001 онуудад Клоди Эньере ОУСС-д ажиллаж байжээ.

Crew-12 багийнхан тус станцад 8-9 сарын хугацаанд ажиллаж, хэд хэдэн туршилт хийх юм. Орос-Украины дайн сунжирсаар буй энэ үед сансрын судалгаа нь АНУ, ОХУ хоёр хамтын ажиллагаагаа үргэлжлүүлж буй цөөхөн салбарын нэг болж байна.

Эх сурвалж: DW