Дэлхий даяар хувийн хөрөнгийн шилжилт хөдөлгөөн түүхэн дээд цэгтээ хүрч, энэ онд өөр улс руу бүрмөсөн нүүх саятнуудын тоо 165 мянгад хүрэх төлөвтэй байгааг CNBC мэдээллээ.

UBS банкны судалгаагаар тэрбумтнуудын 36 хувь нь аль хэдийн иргэншлээ сольсон бол үлдсэн хэсэг нь энэ тухай нухацтай бодож байгаа нь "түүхэн дэх хөрөнгийн их нүүлт" болоод байна. Геополитикийн тогтворгүй байдал, хууль эрх зүйн хатуу заалтуудаас шалтгаалж баян гэр бүлүүд татварын таатай орчин бүхий Арабын Нэгдсэн Эмират, Итали, Швейцарь, Сингапур зэрэг орнуудыг түлхүү сонгох болжээ.

Ялангуяа АНЭ нь татварын хөнгөлөлт болон "алтан виз"-ний хялбар нөхцөлөөрөө тэргүүлж, зөвхөн өнгөрсөн онд гэхэд 9.8 мянган саятныг хүлээн авсан байна. Харин Их Британи шиг татварын тусгай дэглэмээ цуцалсан орнуудаас хөрөнгөтнүүд олноор дайжиж байгаа бөгөөд зөвхөн өнгөрсөн дөрөвдүгээр сараас хойш 16.5 мянган саятан 92 тэрбум долларын хөрөнгөтэйгөө тус улсыг орхин гарчээ.

Эх сурвалж: Office Life