Японы Ерөнхий сайд Такаичи Санаэгийн тэргүүлж буй Либерал ардчилсан нам (ЛАН) ба Инновацын намаас бүрдсэн эрх баригч эвсэл ням гарагт болсон сонгуулийн дүнгээр парламентын доод танхимын суудлын гуравны хоёрыг авах нь тодорхой болсон тухай тус улсын олон нийтийн NHK телевиз экзитпол буюу сонгогчдын хийсэн сонголтын талаарх санал асуулга болон тоологдсон саналуудын дүнгээс эш татан мэдээлжээ.
Тус сувгаар мэдээлснээр, эрх баригч эвсэл парламентын доод танхимд 310 гаруй суудал авч, Үндсэн хуульд өөрчлөлт оруулах боломжтой олонхыг бүрдүүлэх нь тодорхой болжээ. ЛАН болон Ерөнхий сайд Т.Санаэ Үндсэн хуульд өөрчлөлт оруулахыг дэмжиж ирсэн юм. Олонх болсноор мөн дээд танхимын шийдвэрийг харгалзахгүйгээр хууль тогтоомжийг батлах боломжтой болно. Эрх баригч эвсэл дээд танхимд одоогоор цөөнхийн суудал эзэлж байгаа юм.
Бүс нутгуудын сонгуулын хороодын нэгтгэсэн албан ёсны дүнгээр ЛАН парламентын доод танхимд дангаараа олонх болж, 465 суудлаас 258-ыг нь аваад байна. Харин эвсэл дэх тус намын түнш Инновацын нам нь 23 суудал авчээ.
Либерал ардчилсан намын төв байранд хүрэлцэн ирсэн Ерөнхий сайд Т.Санаэ намын гишүүдийнхээ баяр хүргэсэн үгийг хүлээн авах үеэрээ баярын нулимсаа барьж ядан байлаа. Тэрбээр мөн Японы нийт ард иргэдэд хандан дэмжиж, итгэл үзүүлсэнд талархал илэрхийлээд, хүн амыг эдийн засгийн хувьд дэмжих хүрээнд хэрэглээний татварыг түр хугацаагаар цуцлах чиглэлээр ажлаа эрчимжүүлэхээ амлав.
Японы парламентын доод танхимын сонгууль харьцангуй бага ирцтэй явагдлаа. Орон нутгийн цагаар 18:00 цагийн байдлаар сонгогчдын ирц 26.01 хувьтай байсан нь 2024 оны сонгуулиас 2.97 нэгж хувиар бага үзүүлэлт юм. Харин урьдчилсан санал өгсөн иргэдийн тоо энэ удаа түүхэн дээд хэмжээнд хүрч, 27 орчим сая хүн буюу санал өгөх эрхтэй нийт иргэдийн 26.1 хувийг эзэлжээ.
Сонгуулийн өмнө Японы хэвлэл мэдээллийн хэрэгслүүд Ерөнхий сайд Т.Санаэгийн удирдсан эрх баригч эвсэл ялна гэж таамаглаж байв.
Эх сурвалж: NHK
