Олимп бол зөвхөн спорт биш, тамирчдын амьдрал, хувь тавилангийн түүх билээ. Энэ удаагийн наадамд дараах 8 тамирчин олны анхаарлын төвд байна.
1. Йоханнес Клебо: Бүх алтыг аваад гэрлэнэ
Олимпын 5, дэлхийн 15 удаагийн аварга, Норвегийн цанын суутан Йоханнес Клебо бүх цаг үеийн хамгийн олон медальтай тамирчин болох зорилготой байна. Тэрээр хэдийнэ скиатлоны төрөлд эхний алтаа авсан бөгөөд Олимпын дараа бага насны найз Пернилла Досвиктайгаа хуримлахаар төлөвлөжээ.
2. Арианна Фонтана: 20 жилийн дараах эргэн ирэлт
Шорт-трекийн домог Арианна Фонтана анх 15 настайдаа "Турин-2006"-аас медаль авч байв. 20 жилийн дараа тэрээр 11 олимпын медальтай супер од болж эх нутагтаа дахин уралдаж байна. Түүний "шатахуун" нь Италийн уламжлалт хатаасан мах буюу брезаола гэнэ.
3. Доротея Вирер: "Биатлоны мисс"-ийн салах ёслол
Италийн гоо бүсгүй Доротея Вирер энэ олимпын дараа зодог тайлахаа мэдэгдсэн. Гэр бүл, хүүхэдтэй болохыг хүсэж байсан ч эх орондоо болох олимпод оролцохоор карьераа сунгасан тэрээр холимог буухиа төрөлд мөнгөн медаль хүртээд байна.
4. Эрик Перро: Шинэ үеийн домог
Биатлоны ертөнцөд үе солигдож байна. 24 настай Франц залуу Эрик Перро энэ улиралд гайхалтай тогтвортой байгаа бөгөөд нутаг нэгт Кантен Фийон-Майегийн амжилтыг давтах амбицтай. Тэд хамтдаа холимог буухиад алтан медаль хүртэж амжжээ.
5. Микаэла Шиффрин: Хувь тавилангийн шалгуур
Түүхэн дэх хамгийн шилдэг уулын цаначин Микаэла Шиффриний амьдрал сорилтоор дүүрэн байв. Эцгээ ослоор алдаж, өмнөх олимпод амжилтгүй оролцсон тэрээр энэ удаа өөрийгөө ялан дийлж, дахин алтан медалийн тавцанд гарахаар зүтгэж байна.
6. Марко Одерматт: Швейцарь "нисгэгч"
Уулын цанын замаар "нисдэг" Марко Одерматтаас хөгжөөн дэмжигчид нь 3 алтан медаль хүлээж байгаа. Хэдийгээр эхний уралдаандаа 4-р байрт орсон ч түүнийг энэ олимпын гол дүрүүдийн нэг гэдэгт хэн ч эргэлзэхгүй байна.
7. Коннор Макдэвид: "Гурвалсан алтан клуб"-ын босгонд
Хоккейн супер од Макдэвид дэлхийн аварга болсон ч Стэнлийн цом болон Олимпын алт хараахан аваагүй. Хэрэв тэрээр Канад улсын багтайгаа Миланд түрүүлж чадвал хоккейн хамгийн нэр хүндтэй "Гурвалсан алтан клуб"-т орох том алхам хийнэ.
8. "Хоёр Тоби": Найм дахь алтны эрэлд
Германы чаргачид Тобиас Вендль, Тобиас Арльт нар буюу "Бавария-экспресс" дөрөв дэх олимпдоо дараалан түрүүлэхийг зорьж байна. Хэрэв тэд дахин дубль хийвэл өвлийн олимпын түүхэн дэх хамгийн олон медальтай домгуудтай зэрэгцэх юм.
