Японы парламентын гол танхим болох доод танхимын ээлжит бус сонгууль өнөөдөр болж байна. Хэдийгээр зарим бүс нутагт их хэмжээний цас орсны улмаас зарим сонгогч саналаа өгч чадахгүй байх магадлалтай байгаа ч анхны эмэгтэй Ерөнхий сайд Такаичи Санаэ илт давуу ялах төлөвтэй байна.
Ерөнхий сайд Т.Санаэгийн удирддаг консерватив эвсэл парламентын доод танхимын 465 суудлаас ойролцоогоор 300 суудал авахаар байгааг сүүлийн өдрүүдэд явуулсан санал асуулгуудын дүн харуулжээ. Хэрэв Т.Санаэгийн удирддаг Либерал ардчилсан нам болон Японы Инновацын нам (Ишин) 310 суудал авбал ямар ч хуулийг батлах боломжтой болно. Эрх баригч эвсэл сонгуульд ялагдвал огцорно гэдгээ Т.Санаэ мэдэгдсэн юм.
Энэ удаагийн сонгуульд 1 284 нэр дэвшигч өрсөлдөж байгаа бөгөөд 289 гишүүн нэг мандаттай тойргийн санал хураалтаар сонгогдох бол 176 гишүүнийг намын жагсаалтаар сонгоно. Захиргааны асуудал, харилцаа холбооны яамны мэдээлснээр, сонгогчид орон нутгийн цагаар 7:00-20:00 цаг хүртэл 44 642 санал авах байранд саналаа өгөх боломжтой. Гэвч Япон тэнгисийн эрэг дагуух бүс нутгуудад их хэмжээний цас орсны улмаас зарим санал авах байр эрт хаагдаж магадгүй байна.
Цаг агаарын тааламжгүй нөхцөл байдал сонгогчдын ирцэд ихээхэн нөлөөлөх магадлалтай гэж ажиглагчид үзэж байна. Гэхдээ цаг уурчид хоёрдугаар сарын 8-ны өдрийг хүртэл их хэмжээний цас орно гэж урьдчилан мэдээлсэн тул олон сонгогч урьдчилсан санал хураалтад оролцжээ. Албаныхны мэдээлснээр, сонгогчдын 20.09 хувь нь нэгдүгээр сарын 28-наас хоёрдугаар сарын 7-ны хооронд урьдчилсан санал хураалтад оролцсон нь 2024 оны доод танхимын сонгуулийн урьдчилсан ирцээс 26.56 хувиар илүү байна.
Сонгуулийн кампанит ажлын гол сэдэв нь эдийн засаг байв. Ажиглагчдын хэлснээр, сонгогчид үнийн өсөлтөд хамгийн их санаа зовж байна. Нэр дэвшигчид мөн гадаад иргэдтэй холбоотой бодлого, сүүлийн саруудад сонгогчдын сонирхлыг ихээр татаж буй асуудлуудад анхаарал хандуулсан байна. Харин гадаад бодлогын асуудлууд кампанит ажлын үеэр бараг хөндөгдөөгүй байна.
Reuters
