АНУ-ын Ерөнхийлөгч Дональд Трамп Ирантай худалдаа хийдэг улс орнуудаас импортолж буй бараа бүтээгдэхүүний гаалийн татварыг нэмэгдүүлэх боломж олгосон захирамжид гарын үсэг зуржээ. Уг баримт бичигт татварын хувь хэмжээг тодорхой заагаагүй боловч ногдуулах аргачлалыг тодорхой заасан байна.
“Энэхүү захирамж хэрэгжих өдрөөс эхлэн нэмэлт адвалорын татварыг, жишээ нь 25 хувийн татварыг /барааны үнээс 25 хувийг татвар болгон ногдуулна/ Ирантай шууд болон шууд бус худалдаа хийж буй орнуудын бүх төрлийн бараа, үйлчилгээнд ногдуулж болно” гэж дурджээ. Уг захирамж хоёрдугаар сарын 7-ноос хүчин төгөлдөр болсон байна. "Иран улстай бизнес эрхэлж буй аливаа улс АНУ-тай хийж буй бүх төрлийн худалдаанд 25 хувийн татвар төлнө" гэж Трамп нэгдүгээр сарын 12-нд Truth Social нийгмийн сүлжээндээ мэдэгдэж байсан юм.
АНУ-ын засаг захиргаанаас авч буй дээрх шинэ алхмын талаар Ираны тал одоогоор тайлбар өгөөгүй байна. Тус улсын экспортын гол бүтээгдэхүүн нь түүхий газрын тос хэвээр байгаа бөгөөд 80 орчим хувийг Хятад руу нийлүүлдэг гэж Reuters агентлаг дүн шинжилгээний Kpler компанийн мэдээллийг эш татан бичжээ.
Гэвч Хятадын гаалийн мэдээнд Ираны газрын тосны нийлүүлэлтийн талаарх мэдээ 2022 оноос хойш гараагүй бөгөөд шинжээчид үүнийг газрын тосыг гуравдагч орнуудаар дамжуулан ачдаг, Малайз эсвэл Индонезын нэрээр бүртгэгддэг гэж тайлбарлаж байна.
ТАСС
