АНУ-ын зүгээс шаардсаны дагуу хувийн хөрөнгө оруулагчдад газрын тосны салбарыг нээлттэй болгох тухай хуулийг Венесуэлийн парламент баталжээ.
Энэ хууль бол “шинэчлэлийн түүхэн үсрэлт” гэж тус улсын ерөнхийлөгчийн үүрэг гүйцэтгэгч Делси Родригес өчигдөр мэдэгдсэн байна.
Өнөөдрийг хүртэл зөвхөн төрийн өмчийн PDVSA компанитай хамтран ажилладаг үйлдвэр аж ахуйн газруудад тус салбарт үйл ажиллагаа явуулах зөвшөөрөл олгодог байсан бөгөөд PDVSA хувьцааны хяналтын багцыг эзэмшдэг байжээ. Харин одоо хувийн компаниуд төрийн өмчийн компанитай хамтарсан үйлдвэр байгуулахгүйгээр газрын тос олборлож, худалдах эрхтэй болж байна. Ингэхдээ олборлолтын орлогоос 15-30 хувийн татвар төлөх бөгөөд татварын хэмжээ нь тухайн төсөлд оруулсан хөрөнгө оруулалт, ашигт ажиллагааны түвшнээс хамаарна.
Ийнхүү хууль эрхзүйн өөрчлөгдөж буй энэ үед АНУ Венесуэлийн нефтийн салбарын эсрэг авсан хориг арга хэмжээгээ сулруулж, тус улсын засгийн газар болон PDVSA компанитай гэрээ хэлцэл байгуулахыг зөвшөөрчээ. Мөн Америкийн хяналтан дор нефть экспортлохыг зөвшөөрсөн тул PDVSA компани олборлолтоо нэмэгдүүлж эхэлсэн байна.
Шинэ хэлэлцээрийн хүрээнд АНУ Венесуэлийн нефтийг борлуулж эхэлсэн бөгөөд одоогоор эхний хэлцлүүдээс 500 сая долларын орлого олж, Америкийн эрх баригчдын хяналтан дахь дансанд байршуулжээ. Гэрээний дагуу нийт 2 тэрбум долларын борлуулалт хийх бөгөөд орлогыг Катар дахь данснуудад байршуулна.
Эх сурвалж: DW
