Австралид хэд хэдэн муж улсыг хамарсан аагим халуун үргэлжилсээр байгаа тухай хэвлэлүүд мэдээлжээ.
Мягмар гарагт Викториа муж улсын эрэг дагуух хотууд болох Хоуптаун, Уолпапад +48.9 хэм хүрч халсан нь түүхэн дэх дээд үзүүлэлт юм.
Өмнөх дээд үзүүлэлт 2009 онд бүртгэгдсэн бөгөөд тухайн жилд их хэмжээний хохирол учруулсан түймэр гарч, 173 хүн амиа алдсан байна. Одоогоор хүний амь эрсэдсэн талаар мэдээлэл байхгүй байна. Гэхдээ эрх баригчдын мэдээлснээр, гурван бүс нутагт ойн түймэр дэгдээд байгаа бөгөөд гал сөнөөгчид түймрийг хяналтдаа авч чадаагүй байгаа ажээ.
Аагим халуун мөн Мельбурн хотыг нөмөрчээ. Даваа гарагт Австралийн нээлттэй тэмцээний аварга шалгаруулах тэмцээнийг 50 мянга орчим хүн үзсэн бол мягмар гарагт хэт халалттай холбоотойгоор үзэгчдийн тоо 21 мянга болж цөөрчээ.
Зохион байгуулагчид зарим тоглолтыг хойшлуулж, тамирчид, үзэгчдийг хамгаалахын тулд цэнгэлдэх хүрээлэнгүүдийн дээврүүдийг хаасан байна.
Лхагва гарагт бүс нутагт агаарын хэм бага зэрэг буурсан боловч аагим халуун долоо хоногийн эцэс хүртэл үргэлжлэх төлөвтэй байна.
Австраличууд түүхэн дэх хамгийн халуун өдрүүдийг туулан өнгөрүүлж байгаа бөгөөд тус улсад хэдэн долоо хоногийн өмнө мөн хэт халсан юм. Викториа муж улсад халалт үргэлжилж байгаа бөгөөд халуун агаар Квинслэнд, Шинэ Өмнөд Уэльс зэрэг зарим муж улсуудыг нөмөрсөн байна.
Эх сурвалж: Euronews
