Ираны эсрэг цэргийн ажиллагаа явуулсан тохиолдолд агаарын орон зай, нутаг дэвсгэрээ ашиглуулахгүй гэдгийг Саудын Арабын угсаа залгамжлах ханхүү Мохаммед бен Салман Ираны Ерөнхийлөгч Масуд Пезешкианд мэдэгджээ. Энэ тухай Саудын Арабын төрийн мэдээллийн SPA агентлаг мягмар гарагт мэдээлсэн байна.
Ираны Ерөнхийлөгчтэй утсаар ярих үеэрээ бен Салман бүс нутгийн аюулгүй байдал, тогтвортой байдлыг бэхжүүлэхийн тулд “зөрчил маргааныг яриа хэлэлцээгээр шийдвэрлэх аливаа хүчин чармайлтыг” дэмжинэ гэдгээ мэдэгджээ.
Ираны хэвлэлүүдэд мэдээлснээр, дайн гарахаас сэргийлэхийн тулд олон улсын хүрээнд явуулах ямар ч үйл явцыг хүлээн зөвшөөрч байгаа гэдгээ Пезешкиан Саудын Арабын угсаа залгамжлах ханхүүд хэлсэн байна.
Арабын Нэгдсэн Эмират Улс мөн Ираны эсрэг цэргийн ажиллагаанд агаарын орон зай, нутаг дэвсгэрээ ашиглуулахгүй гэж мэдэгдсэний дараа дээрх мэдээлэл гарч байна.
АНУ-ын Ерөнхийлөгч Дональд Трамп өнгөрсөн долоо хоногт Америкийн флот Ираныг чиглэн хөдөлж байгаа гэж мэдэгдээд, флотыг ашиглах шаардлага гарахгүй хэмээн найдаж байгаагаа илэрхийлсний дараа Иранд цэргийн ажиллагаа явуулах эсэхтэй холбоотой тодорхойгүй байдал үргэлжилсээр байна.
Эх сурвалж: Reuters
