Японы Ерөнхий сайд Таикачи Санаэ Либерал ардчилсан нам /ЛАН/ ба “Японы шинэчлэлийн нийгэм” намаас бүрдсэн эрх баригч эвсэл ирэх сард болох парламентын доод танхимын сонгуульд олонхын суудал авч чадахгүй тохиолдолд огцорно гэдгээ мэдэгджээ. 

Тэрбээр Токио хотод сонгогчдын өмнө үг хэлэхдээ “Би сонгогчдын итгэлийг олж авахыг хүсэж байна. Хэрэв ЛАН болон “Японы шинэчлэлийн нийгэм” нам олонхын суудал авч чадахгүй бол би Ерөнхий сайдын албан тушаалаасаа огцорно” хэмээн мэдэгдсэн байна. 

Японы  парламентын доод танхимын ээлжит бус сонгуулийн сурталчилгаа нэгдүгээр сарын 27-ноос буюу өнөөдрөөс албан ёсоор эхэллээ. Сонгууль хоёрдугаар сарын 8-нд болно. Энэ удаагийн кампанит ажил нь Японы дайны дараах түүхэнд хамгийн богино хугацаанд болж байгаа юм. Түүнчлэн одоогоор ихээхэн дэмжлэг хүлээж буй Ерөнхий сайд Т.Санаэгийн тэргүүлж буй эрх баригч эвсэлд давуу тал болж байгаа бол сөрөг хүчнийхэнд хүндрэл үүсгэж байна.

Олон нийтийн дунд явуулсан санал асуулгуудын дүнгээс харахад ЛАН-ыг хамгийн ихээр дэмжиж байгаа хэдий ч тус намын дэмжлэгийн түвшин Ерөнхий сайдын хувийн нэр хүндээс шалтгаалж буй Засгийн газрын рейтингээс нэлээд доогуур байна. Тухайлбал, Nikkei сонины явуулсан санал асуулгад оролцогчдын 40 хувь нь ЛАН-д санал өгөхөөр төлөвлөж байгаа бол Т.Санаэгийн тэргүүлж байгаа Засгийн газрын рейтинг 65 хувьтай байна.

ЛАН сүүлийн жилүүдэд дараалан ялагдсаны улмаас парламентын хоёр танхимд олонхын суудлаа алджээ. Тус нам “Японы шинэчлэлийн нийгэм” намтай эвссэнээр доод танхимд ялимгүй олонх /465 суудлаас 233-ыг эзэлсэн/ болсон юм.  

Гэвч сүүлийн үед Ерөнхий сайд Т.Санаэ болон түүний Засгийн газрын дэмжлэг огцом өссөн байна. Хамгийн сүүлийн санал асуулгуудаар рейтинг нь 60-70 хувьд хүрчээ. Т.Санаэ болон түүний багийн тооцоолж буйгаар, дэмжлэг өндөр байгаа тул удахгүй болох сонгуулиар эрх баригч намын парламент дахь байр суурийг бэхжүүлж, илүү олон суудал авч чадна хэмээн найдаж байна.

Эх сурвалж: Kyodo