Энэтхэг ба Европын Холбоо түүхэн худалдааны хэлэлцээрийг эцэслэн байгуулсан тухай Энэтхэгийн Ерөнхий сайд Нарендра Моди мягмар гарагт буюу өнөөдөр мэдэгдлээ. Энэхүү хэлэлцээр нь АНУ-тай харилцаа тогтворгүй байгаа үед талуудыг хамгаалах зорилготой ажээ.

Хорь шахам жилийн турш яриа хэлэлцээ хийсний эцэст байгуулсан энэхүү хэлэлцээр нь дэлхийн хамгийн олон хүн амтай, өргөн зах зээлээ хамгийн том худалдааны түнш болох 27 улсаас бүрдэх Европын Холбоотой чөлөөт худалдаа хийх замыг Энэтхэг улсад нээх болно.

"Өчигдөр Европын Холбоо, Энэтхэгийн хооронд томоохон хэлэлцээрт гарын үсэг зурлаа" гэж Н.Моди мэдэгдээд, дэлхий даяар хүмүүс үүнийг хамгийн чухал хэлэлцээр гэж нэрлэж байна. Энэхүү хэлэлцээр Энэтхэгийн 1.4 тэрбум хүн болон Европын сая сая хүнд асар их боломжийг нээнэ" хэмээн хэлжээ.

Н.Моди, Европын Комиссын дарга Урсула фон дер Ляйен нар Шинэ Делид болох Энэтхэг-Европын Холбооны дээд хэмжээний уулзалтын үеэр хамтарсан мэдэгдэл хийх төлөвтэй байна.

Энэтхэг, Европын Холбооны худалдааны хэмжээ 2025 оны гуравдугаар сард дууссан санхүүгийн жилд 136.5 тэрбум ам.долларт хүрчээ.

Өнгөрсөн онд Индонез, Мексик, Швейцар улсуудтай байгуулсан хэлэлцээрийн дараа Европын Холбоо Өмнөд Америкийн Меркосур эдийн засгийн холбоотой гэрээнд гарын үсэг зурснаас хэдхэн хоногийн дараа уг хэлэлцээрийг байгуулж байна.

Энэ хугацаанд Энэтхэгийн эрх баригчид мөн Их Британи, Шинэ Зеланд, Оман улсуудтай худалдааны хэлэлцээр байгуулжээ.

Эдгээр цуврал хэлэлцээр нь улс орнууд АНУ-аас учирч болзошгүй эрсдэлээс өөрсдийгөө хамгаалахыг эрмэлзэж буйг харуулж байна. Учир нь Ерөнхийлөгч Дональд Трампын Гренландыг нэгтгэх гэсэн оролдлого, Европын орнуудад татвар ногдуулж магадгүй байгаа нь Барууны орнуудын хувьд сорилт болж байна.

Трамп Энэтхэгээс импортолж буй бараа бүтээгдэхүүнд 50 хувийн татвар ногдуулсан бөгөөд өнгөрсөн онд Энэтхэг, АНУ-ын худалдааны хэлэлцээр засгийн газар хоорондын асуудлаас болж цуцлагджээ.

Хууль эрх зүйн асуудлыг цэгцэлсний дараа Энэтхэг-Европын Холбооны хэлэлцээрт албан ёсоор гарын үсэг зурах ажээ. Энэхүү ажиллагаа 5-6 сар үргэлжилнэ гэж Энэтхэгийн засгийн газрын албан тушаалтан мэдээгдсэн байна.

"Бид гэрээг нэг жилийн дотор хэрэгжүүлж эхэлнэ хэмээн найдаж байна" гэж албан тушаалтан нэмж хэллээ.

Эх сурвалж: Reuters